[saaaaad]

.....السلام عليكم
إذا أي واحد عرف وش معنا الرساله يكتب بالرد
رسالتس اللي كزيتي وصلتن وفرحت به ...وكثر الله خيركم على المقطع والغدفه الي كزيتي لي,وابشرتس ان اخبارنا تسرتس. البقرة اضنت ، والبيض فقش ، والدجاجه الرقطا راجن ،وإن إدحيم العلي أعرس ، ونوّير مخطوبة ، وعويش فطمناه من الرضاع ، وسويرة رفعناه من السقاط ، وصويلح شراله دنانة ، وسليم ختم المصحف ، وإعزيز الصالح طاب من الطنان ، وسند ولد مضيوي بدا يحبي ، والحمد لله طاب الجحام الي بعينه ، وأنتي صاتزه حطينا عليه تبنه ، وحصيصه طابت إقطوفه الي براسه ، ومنيره مشطناه بورده .
وأم سويلم طلعت من الماجب ، وتممنا لسويلم ، والنعال الزنوبا اللي تخبرين عندناهاك السنه رقعناه ، ومقطع الروز خبناه ، والدوشق غيرنا قطاعته ، و السفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ، والسراج زينا فتيلته .والزبيل مليناه حتات من إنخلتنا ، وشرينا سحارة ولقيناه مكسورة .وبقولس إني مع هالحمولة غاديتن حوسة ، الطاية تخر ، والمثعب منشق ، والقتاله منقلعة ، و باب الروشن منكسر، والتسوله مسنيّه ، وبريتز الغرش الصغير منقشع ، والله يهديتس يأم دحيم.البزار الي كزيتيه شوي الكركم به ، والمسمنه تقل رماد مابه ليمون ، والفتيت مسري ، والكليجا تقل عظامة . وذا بغيتوا تكزون شي:كزوا شي يبل الريق ويواجه عند الحمولة . معكم علم إن حمولتنا ناس نقادة . وخالتي شرّاهة ، وعمتنا حقنة مايجوز لهاشي مثل رقاص الساعة،.وحريم عمومتنا صرت إثمنلهن ، وجذعانهم فرقا عين جدي شيبان كبري يترددون علي هالجصة قضوا على النعمة تقل دبا ، ونا ماودي أطول عليك الحتسي عسا مايخليني منتس ، ولامن جناين قلبتس ، لاخلا ولا عدم وسلميلي على نفستس ومن يعز عليتس .و أخص بالسلام مضيوي وفطوم وقوليلهم والله ماخلان أقصر عنوتي عنكم وأشوفكم إلا إني عويجزة ولاصقة علي ظهيري وضليعاتي ومارخة كتوفي ورجيلاتي بالفقس .. ومعتس علم هالارياح يعودن بين حين وحين ومع هالبراد صايلات علي يالله حسن الخاتمة والعمل الصالح وسلمي وأنتي سالمة.

اختتس : منير السمهله

رسالتس اللي كزيتي { رسالتك التي بعثتيه لي }
وصلتن وفرحت به ...وكثر الله خيركم على المقطع والغدفه{ المقطع نوع من القماش الغدفه لاتزل على اسمع والبهض يقول طرحه الي كزيتيلي { التي ارسلتي لي } ,وابشرتس ان اخبارنا تسرتس { وابشركي أن اخبارنا تسركي } . البقرة اضنت {ولدة } ، والبيض فقش ، والدجاجه الرقطا راجن ،وإن إدحيم العلي أعرس ، ونوّير مخطوبة ، وعويش فطمناه من الرضاع ، وسويرة رفعناه من السقاط ، وصويلح شراله دنانة {لعبه للاطفال }، وسليم ختم المصحف ، وإعزيز الصالح طاب من الطنان { مرض يصيب الاذن } ، وسند ولد مضيوي بدا يحبي ، والحمد لله طاب الجحام الي بعينه ، { مرض يصيب العين } وأنتي صاتزه حطينا عليه تبنه { وانت صادقه حطينا عليه تبن لأن معرف التبن علاج للعين المجحمه } ، وحصيصه طابت إقطوفه الي براسه { مرض يصيب الراس قديم لكثرة الاوساخ } ، ومنيره مشطناه بورده { وضعنا في رأسه حنا واضفنا له ورد ليصبح ذو رائحه زكيه } .
وأم سويلم طلعت من الماجب{ النفاس } ، وتممنا لسويلم { هي العقيقه } ، والنعال الزنوبا اللي تخبرين عندناهاك السنه رقعناه { هن نعال الشبشب قمنا بصيانتهن } ، ومقطع الروز خبناه { نوع من انواع القماش الفاخر قم برقعه خياطاته } ، والدوشق غيرنا قطاعته { هو لااسفنج قمنا بتغيير قماشه } ، و السفرة الكبيرة علقناه بالقبة ، وحطينا بيت للرادو ، والمصحف حق عمي غيرنا ثوبه ، والسراج زينا فتيلته .والزبيل مليناه حتات من إنخلتنا { الزبيل معروف والحتات مايتساقط من النخل اثناء اكتمال نوها } ، وشرينا سحارة ولقيناه مكسورة { هي ماتستخدم للحفظ } .وبقولس إني مع هالحمولة غاديتن حوسة { واقول لكي انني بهذه الطريق حالتي مزريه


تعبت تعبت
منقول

.

[الريحاني]

اخوي سعد
هذا حوار اورده الاخ / بارق من باب التندر في بعض العبارات

[الصارم]

.. هههه

.. هذا هرج ولا وشو ؟؟؟؟؟؟؟؟؟

... الله يقطع سبدك ....

... والدجاجه الرقطا راجنه ..؟؟
والمسمنه تقل رماد مابه ليمون ، والفتيت مسري ، والكليجا تقل عظامة

وقوليلهم والله ماخلان أقصر عنوتي عنكم وأشوفكم إلا إني عويجزة ولاصقة علي ظهيري وضليعاتي ومارخة كتوفي ورجيلاتي بالفقس ..


... س لا م ...