[أبو رياض]

السلام عليكم ورحمة الله وبركاته ..

تحية طيبة من الأعماق إلى أهل هذا المنتدى الرائع ..

وكم أنا مشتاق لكم أيها الأحباب ..


لن أطيل عليكم ..
الذي دفعني لكتابة هذا الموضوع هي قصة حقيقية وحصلت لي أنا شخصياً
على مدار اليومين الماضيين ..

سأرويها لكم بالتفصيل ..
وبدون مبالغة أو اطالة ..

أعتقد لا يمكن أن تتخيل مشهد أكثر إثارة من أن يقوم جني بمطاردتك ..
أو إحداث الخوف في نفسك ..

ولكن ربما ستفقد عقلكـ ..


:: القصة ::

يوم الجمعة لم يكن يوماً عادياً بالنسبة لي أو لرفاقي الذي كانوا بصحبتي ..
ولم نتخيل يومها أننا سنفعل مجازفةً كادت أن تودي بحياتنا للخطر ..

مرني واحد من الشباب وكان هدفنا إنا نطلع نتعشى برا ..
اتصلت على زميلنا الثالث وطلبت منه إنه يخاوينا ..
كانت الساعة تقريباً الواحده في منتصف الليل ..

المهم أخذنا عشانا وطلعنا في المضمار ..

وبدينا نسولف ومن سالفه لسالفة ومن موضوع إلى موضوع

حتى استقر الموضوع حول الجن وبيوت الجن ..

بدينا نتكلم وقصص وروايات ..
جت في بال واحد من ربعنا فكرة ..
وهي إنا نروح لبيت الجن الي موجودة في خب الجطيلي ..
وبدأ بيننا التحدي ..
يابزر يارجال ..
اتفقنا إنا نروح وندخلها كلنا الثلاثة وكانت الساعة تقريباً ثنتين ونصف ..

أنا ماكنت أظن إن ربعي بيجزمون لأني أعرفهم ذروقين ..
وخوافين ولا أهون أنا ..


قلنا بما إننا رايحين رايحين وجازمين جازمين ..
كل واحد منا يتصل على خويه ويتحداه ..

وأشوى ويبزع واحد ويقول لكم عشاء اسبوع كامل مني ...

الشباب زاد حماسهم ..
مشينا باتجاه البيت وكلنا خوف × خوف ..

اقتربنا ..

اقتربنا أكثر ..

وصلنا للبيت ..

المنظر كان مخيف موحش مرة ..

وقفنا السيارة يمين ..

نزلنا وكل واحد يقول للثاني خلكـ إنت الأول ..

وقفنا على الباب المنظر كان مره مرعب ..

بعدين رجعنا قلنا خلاص إنا دخلنا إلى حول الباب ..

ماش الشباب بروسهم حب ماطحن ..

قالوا لا نبي ندخل زيادة ..

دخلنا مرة ثانية وقربنا أكثر وصلنا إلى حول الدرج ..
رجعنا ..
خلاص دخلنا وش تبون أكثر من كذا ..

طلعنا ..

برضه حسينا إنا مادخلنا قلنا نوصل الصالة ونرجع ..
وفعلاً دخلنا للمرة الثالثة ووصلنا الصالة ووقفنا فيها شوي ..

عيشوا معي الجو لحظات ..
سكون ..
ظلام ..
الساعة تقريباً 3,00
الأرض مليانه قراشيع ..


بسم الله .. بسم الله .. بسم الله


طلعنا مرة ثانية ..

الصراحة بعد ماخرجنا بأمان ..
حسيت إني مسوي شيء كبير ..
لكن أصحابي لزموا إنا نصعد للدور الثاني وننزل ..
حتى ما يكون لأحد حجة ..

أنا رفضت وبشدة ..

قلت تبي تروحون روحوا إنتم ..

وأن بصوركم ..

وبينماحنا واقفين على الباب ومحاولات إقناع ..

حصل شيء وحى الآن مازال في مخيلتي وعيا يزول ..
لدرجة إني أنام وأفتح البيبان واللمبات وكل شيء هذا إذا جاني النوم ..


حتى لا نخرج عن جو السالفة ..

سمعو الشباب صوت شيء يقع ..
أنا ماسمعت شيء ..
فجأة إلتفتنا يمين

إذ بشيء من بعيد متجه للعمارة ويصرخ ..

طبعاً الشكل شكل آدمي ..

لكن الغريب إنه قفز وصرخ وطاح ولا ندي وين اختفى ..

وصراخ .. صراخ ..
وركض جري ماتصورون وناصل السيارة ونركب كلنا ورى من الروعة ..
ونشغل ونمشي خمسة الآف ..

بعد ماركدنا شوي ..
تبادر لأنفسنا مثل ماتبادر لكم إنه يمكن يكون واحد يبي يوحشنا ..

وبدينا ندور حول العمارة نستطلع الوضع ..

لكن هذه النظرة تغيرت جذرياً بعد الي حصلنا من الغد ..


وراح تقتنعون بمعنى كلامي ..

مشينا لم ربعنا ..

المهم إلى الحين بروسنا شيء نبي ندري وش هذا الي طلع لنا ..

ونتفق إننا نجي من بكرا .. في نفس الوقت ...

ذهبت للبيت والموقف براسي عيا يروح وعجزت أنساه ..

ووساوس وتخيلات الله لا يوريك ..


المهم نمت وراحت السالفة ..

المغرب اتصل فيني واحد من الشباب ,.,

وش عندك قلت له والله فاضي ...

مرني ورحنا قلت فرصه خل أقول له الموقف ..

بعد مارويت له السالفة راح يوريني بيوت جن ثانيات ويتحداني أدخل ..

قلت أنا أبيك تدخل للعمارة الي حنا دخلناها ..

قال أنا أبدخل لحالي وأبطلع عليك مع السطع أصوت لك وش تبي تعطين ..؟؟

قلت ياشييييخ روح لك عشاء اسبوعين مو اسبوع من أفخم مطع في بريدة ..

الرجال نحر البيت ..

وقف بعيد ونزل ..

دخل البيت طلع للدور الأول والثاني وصل السطح طلع على وصوت لي ,,

فجأة ..
نزل يمشي ترررررليون ..

ويطلع من البيت ويقوللا اركب اركب ..

ركبت وبسرعه ركب وهو يالله يتنفس ..

وش السالفة ..

قال يوم إني صوت لك وأسمع واحد يناديني يقول وقف .. وقف ..
وكل مانزلت دور سمعت الصوت نفسة ..


أن دخلن الماء ..

دقيت على سلاحف النينجاء وقلت يالربع هذي السالفة وهذي السالفة إنتم ملزمين الليله

ندخل ..

قالوا عادي ندخل بسرعه وننزل ..

المشكله الرجال يحلف لي إنه سمع الصوت ..


راحت السالفة ..

جت الساعة وحده بالليل ويدقون علي أبطال الديجيتال يالله نمشي ..

ياشباب إنتم ملزمين إيه ملزمين ويالخواف يالجبان ..

قلت الله يقلع الي مايطاوعكم ..

وأدق على واحد ونروح نمرهم ..

يعني كم صرنا ..؟؟

حنا ثلاثة والسواق وواحد رفيقه ..

خمسة ..

ونوجه لم البيت ...


وهنا فعلاً اقتنعت ان الي طلع علينا الليلة الي قبله مو آدمي جني .. جني ..

راح أكمل لكم بعدين ..

كيف الجوال لما طاح مني في البيت لقيناه مطلع برا في الشارع ..
كيف صدر الصوت .
كيف طلع علينا الجني ..
كيف خرجنا من البيت بسلام ..
كيف كدنا نفقد عقولنا ..



والله لا يعيده من تحدي ..
وفعلاً الإنسان معافا ..
مادام معه عقله ..


أكملكم الحدث غذا إن شاء الله ..

دمتم بخير وعافية ...

[أبـو خـبـيـب]

رووووووووعة . .

جزوم بزيادة يا بعدي . .

كمل . . لا توقف ..
..
وتراي خويك المرة الجاية . . <== ما تأدب . . !!

[البوارق]

لاحول ولا قوة الا بالله

---------------------------

على ذكر خب الجطيلي وبيت الجن

حصل لي قصة هناك الله لايعيده

كنا رايحين لمطعم بالفاخرية وطلبنا العشاء

وجاء بخاطري واتحى الشباب اللى معي اننا نوقف السياره بجانب البيت المظلم وناكل عشانا في وسط السياره واذا انتهينا نمشي

وبعد وصولنا بالسياره الى الموقع
اطفات محرك السياره قلت يالله ياشباب كلن ياخذ حقه من اللي طلب

ونحن بدينا نأكل الا واسمع انا ( عواء ) يقووول عوووووووووووووووووووو

الا انا نسيت اللى معي وجدعت الاكل بجنب البيت المسكون وشغلت السياره على عجاله والى البيت

فـ ياسبحان الله

[خالد بن محمد]

قصة غريبة لا تخلوا من النُـكَـتْ المبكية ..


بانتظار الجزء الثاني ..


تحياتي ..

[.: أبو مصعب :.]

هلا حبيبي أبو رياض ...

وشلونك بعد أمس..
ياشباب السالفة حقيقة..
وأنا من ضمن الخمسة..
شيء ما يوصف ..
بالعادة نسمع قصص الجن ...
المرة شيء قدامي ..
طبعاً أنا مانزلت ..

لأنهم يقولون من خاف سلم..

ويقولون خواف ولا يقلون الله يرحمه ؟؟؟

أول ماركب أبو رياض ومشينا قالي مافيه نوم نبي ندور لما
تطلع الشمس!!!!
طبعا أفترقنا الساعة سبع وربع الصبح ..
والله أنا مانمت إلا الساعة ( حدعش ) الظهر!!
وهذه السالفة ..
مازال صوت الصراخ و(هجة العيال ) وركوبهم في خيالي ..
من الطرائف ..
مابين خوف وضحك ..
الثلاثة اللي دخلوا البيت طبعاً الباب مفتوح صفقة وحدة ..
وتخيلوا ثلاثة هاجين وخايفين !!!
ومع باب صفقة وحدة كلهم يبي يهج الاول ...

هذا ماحصل ..

[حفيد اعقيل]

مجازفة كااد أن يكون ثمنها غالياً ,,
الحمد لله على السلامة ,,

[المستشار]

مهبل ..
يعني بريدة وش زينه و وش وسعه ،،
ما شاء الله ديرة كبيرة ما مسكت معكم تمشون إلا ببيت الجن .. !
اللهم لا شماته ،، لو أن البيت به خير كان تلقى اللي جنبه معمور و مبني ..

بس أبتل أقول مهبل ..
هههههههههههههههه

[al7nooooon]

الحمد لله على السلامه،،
وما أدراك قد تحدان واحد بـ500 ادخله لكن مابعت عمري للحين..


ابراهيم

[عطش الرمال]

أنا وواحد معي داخلين البيت هذا

السلام عليكم
مرحبا أبو رياض
قصة ممتعه صراحتاً
أنا لا أكتمك أنني دخلت هذا البيت
لا وقعدنا نفطربوسطه بعد
والأدهى أن أخويانا بالسيارة
...

أو أقولك السالفة من أوله
الا وهي أننا شرينا فطور مهنا زينه وكثير ويطربك
مرينا من عند بيتكم أو قصدي خويتكم
بعد الفجر بساعة يعني مع الإشراق
المهم دخلنا ورقينا للدور الثاني
به فتحه على الشاررع
مو هيك الاهيك
قعدنا نويق على أخويانا وناكل الفطور
المهم به دجاجه شوايه به راسه ؟؟؟!!!
يعني الراس جديد والدجاجة مشويه
ويمكن ألف دجاجه مب وحده
ومثل ما ذكرت المكان مليان حوووووووووووسة
أفطرنا وقعدنا وبردنا وسولفنا ومشينا
أخويانا بالسيارة يوم جيناهم يقولون جوكم الدقر
قلنا وشوم الدقر
قالوا أنه كل شوي داخل واحد دقري يمكن خمسة دخلوا
قلنا لا ما شفنا شي هذولا إخواننا من الجن حياهم الله
؟؟!!
لا وأزودك من الشعر بيت
داخلن بيت العوني اللي بالربيعية
وهو أخطر بيت مشهور بالجن
فيه لمبه مشتغله لمدة 8 سنوات <<== يسددون للكهرب أهل خيخي ((الجن بين قوسين))
أنا جيت أبفك اللمبة أبركبة بغرفتي
مير ينفضن الكهرب نفضه
واااااااااوك أحس بوجعه لهالحين
يمه
؟؟!!!...,,’’’

حبيت أضيف زيادة على موضوع أبو رياض

وشيكرن





تحياتو
مسترعطوووووووووووووش = أبوبريدة =

[ajmn]

إلا وش رايكم ما نحط منتدى اسمه . .
منتدى ( الجن ) ..
أشوف الشباب كلهم لهم مغامرات و حكايات مع الجن . .
و الله إنكم منتهين . .
مثل ما قال أخوي ..
ضاقت بريدة بكم . .
روحوا لم جيان وإلا غيره . .
. . . . . .
أنا بعد لي قصة معها . .
مرة مريت من عندها الساعة 2 بس مهوب بالليل بالقايلة . .
من مسافة 3 كيلو ؟!
و لا شفت شيء . .
تغديت و سولفت ومشيت .,,

[عبدالعزيز المطيري]

والله من الصدز كل واحد يلعب على الثاني
ياجماعه نبي مواضيع مفيده
ملينا المواضيع البايخه

[المسفهل]

أقول يا أبو رياض ... الله يبارك بها الجن اللي ردّوك للمنتدى ..

بإنتظار تكملة القصة الغامضة بعد كبّـــة العشاء من العضو ( عصير الربيع ) ...

[عصير الربيع]

السلام عليكم/
يا اخوان لاتفهمون ردّي غلط انا ما انكر ان فيه جن بالبيت ولا أدري ما هو الشيء الذي خرج أول ليلة .."؟
ومتأكد 1000% أنه ليس مقلب من أحد الذين يعرفون أبورياض ..
راح تقولون ليش متأكد؟؟!
متأكد لأنه ماأحد يدري ان أبو رياض يبي يروح للبيت ..
ومكالماته على الشباب والتحدي ماأحد أخذ بهن لأنه صعب الذهاب للبيت خصوصاً بالليل..


هذا والله أعلم..





محبكم /
عصير الربيع

[أبو رياض]

اقتباس المشاركة الأساسية كتبها أبو رياض راح أكمل لكم بعدين .. كيف الجوال لما طاح مني في البيت لقيناه مطلع برا في الشارع .. كيف صدر الصوت . كيف طلع علينا الجني .. كيف خرجنا من البيت بسلام .. كيف كدنا نفقد عقولنا .. والله لا يعيده من تحدي .. وفعلاً الإنسان معافا .. مادام معه عقله .. أكملكم الحدث غذا إن شاء الله .. دمتم بخير وعافية ...

.. تابع ..

لما وصلنا البيت المقصود .. وقفنا عند الباب ..
وكلنا داخل السيارة ..

يالله شباب ننزل .. ونزلنا طبعاً وقفنا على الباب شوي .. مسلسل العادة كل واحد يبي الثاني يصير الأول ..

حنا ثلاثة واثنين ينتظرونا في السيارة ..

طبعاً حنا كان كل هدفنا إنا نرقى للدور الثاني ونطلع مع الدريشة نصوت لربعنا الي بالسيارة بعدين ننزل ..

لييييييييييييييييييش ؟؟

من شان نكسر التحدي - الله لا يعيده من بزعه - ونربح عشاء اسبوع .... والله المشافيح ..

المهم استعنا بالله ودخلنا البيت المشؤوم متماسكين وبشويش نمشي ..
وصلنا للدرج الدنيا كانت ظلام في ظلام ..
وماكان معنا وقتها أي نور غير نور الجوال الي كان معي وكان ضعيف ..

توقفنا شوي إلا والشباب يالله نرقى ونصوت لأخويانا وننزل بسرعة ..

رقينا الدرج باتجاه الدور الثاني .. وصلنا للدريشة المطله على الشارع ..

أنا كنت أمشي في النص .. طلعنا مع الدريشة وبسرعة نصوت لربعنا حتى يشوفونا ..

وفجأة ..!!

إلا ويطلع لنا صوت صراخ قوي مرة .. ماتتخيلون كيف ..

أشبه مايكون بواحد ماسكه كهرب أو أحرقته بنار أو حاجه زي كذا ..

المهم الصوت كان مرعب بدرجه ماتتصورونها ..

ونركض بسرعة باتجاه الباب والصوت مستمر بالصراخ ..

وأول ما نزلنا من الدرج طاح الجوال من يدي ..

مافكرت مجرد تفكير إني أرجع آخذه من هول الموقف ..

تركته وجري باتجاه الباب ..

تصورو معي هذا المشهد المضحك المبكي ..

باب العمارة صغير يعني صفقة وحدة .. وتصوروا ثلاثة مرعوبين وهاربين باتجاه هذا الباب وكل واحد منهم يقول نفسي نفسي ..

ونتصابخ جميع عند فتحة الباب ..

أنا سقطت بعد الباب وطاحت مني بطاقة الأحوال والصرافه عند الباب ..

قمت وركضت باتجاه السيارة وركبنا جميع ..

ياااااااه كانت لحظات رهيبه ..

وقاموا أخويانا الي بالسيارة يسمون علينا ..

المهم السواق ملزم بيجيب أغراضنا الي طاحت ..

طبعاً ولا واحد منا ركب ونعاله في رجليه لأننا أول ماسمعنا الصراح تحليت ..

ويقترب من الباب ويلقى بطاقاتي وشماغ زميلي ونعله وحده طايحه ..

كل هذولي عند الباب ..

المشكله الجوال طاح من داخل كيف نجيبه ..

وبدينا ندور بالسيارة حول البيت وأنا أحاول بالسواق إنا نمشي عقب الي صار ..

اتجهنا إلى أقرب مسجد وشربنا ماء لين قلنا بس ..

رجعنا مرة ثانية للبيت ..

فجأة صرخ خوينا ..

الجوال الجوال الجوال

لقينا الجوال محطوط على الحبس الي برا البيت هو ومعه النعال الي كانن داخل ..

الصراحة أنا بغى يغمى على يوم شفتها ..

المهم وناخذ الجوال النعال وخمسة الآف للرجال الي مواعدنا بالعشاء نبي نرويله البطوله ..

تتوقعون وش كان رده ..

قال إني كنت متحديكم أمس مو اليوم .. العشاء راح عليكم ..

يابن الذين الحين بغينا ننهبل ونطير عقولنا وآخر شيء تقول أنا قايل أمس ..

ونحاول فيه أقل شيء تسميحة خاطر ..

وانتهى بنا المطاف بأنه لا عشاء ولا موقف بطولي !! ..


أبو رياض
الثلاثاء
7:40 ص