[جرثومه]

بالله وش رايكم فيه ؟ ما تحسون أنه عايش زمانه صح ؟ ومعطي الدنيا بالخامس


هذا مدخل على فكرة لا تقولون يابو عبدالله ما علمتنا

------------------------------------------



والله وانا اخوكم الصغير ,, لي مده في شبكة الهلال .. مرة في المدرج ومرة في العالميه (( يسوي دعايه ))

ومن تالي أدمنت الساحة حقتكم ,, صرت أجلس فيها أنا والربع دايم ,, وسحبنا على كل المنتديات الا المدرج والعالميه (( يسوي دعايه اشطبه يا مشرف ))


أتفرج ,, أتصفح ,, اضحك ,, ثم اطلع وقبل لا أطلع أسيّر على المدرج والعالميه (( ياخوي انت للحين موجود ؟ مابعد شاتك أحد؟ ))


المووووهم ,,,


داخل اليوم الساحه كالعاده ,, مالي طاري حتى أرد ,, فجأة وأنا في رحلة استجمام مع نفسي، لمحت إيقونه مكتوب عليها : موضوع جديد (( رحمتها كأنها تقول لله يامحسنين ))

وتذكرت وصية جدي قبل يموت يوم قال: يا ابو عبدالله يا ولدي ,, لا ترد أحد يطلبك ,, تكفى ياولدي لاتفشلني بين القبايل.

طقيت صدري وقلت للإيقونه : يلعن ام اللي يردك يا بنت الأجواد ,, نضيف موضوع ليش لا أهم شي لاتزعلين علينا يا الطخمه وجدعت عليها الرقم (( اعنبوا بليسه أي شيء مؤنث يرقمه ))


وعلى طاري الترقيم ,, أعرف واحد من الشباب ,, مدمن ترقيم ,, مدمن شيء اسمه اكتب رقمك ويجدعه ,,

لدرجة ان أبوهم مرة راجع البيت وهو شاري صندوق طماط .. وشاف أخونا طماطه في آخر الصندوق متينه ومليانه وحمراء ,, عجبته جدع عليها رقمه



إييييييييه اتركونا من خويي الحين وخلونا نرجع لسالفتنا الأصليه ,,



عندي موضوع والله انه يا جماعه فاقع مرارتي ,, مضيق صدري وفي نفس اللحظه لاحس مخي !!


أباطرحه قدام حضراتكم ,, وأنتم براحتكم, , إن بغيتوا اطرحوه أرضاَ أو ثبتوه جواَ أو دحدروا به على المدرج والعالميه (( رجعت الدعايه انتبه له يا مشرف ))



موضوعنا في هذه الظهريه هو : العبايات ,,, عباية المرأة ,, وآآه يا أخواني من سالفة المرأة وعبايتها لأن موضوعها ذو شجووون والمثل يقول: الشجووون ملعوووون



تكفون لا ينط لي واحد منكم ويقول: وش عليك منهم؟ وش دخل أم اللي جاب مندوبك ؟

لأني وقتها راح أقول له : دخلني الباب وألحس كفر الدباب


ولا يجيني واحد ثاني مطفي النور وداعس ثم يخش فجأة في عيني وهو يشربك ويقول: موضوع مكرر ,,

لأني وقتها راح أظطر أسدد له طراقين . الأول صدقي والثاني مكرر


من جد يا جماعة الخير ,, هل اللي حاصل حالياَ في الأسواق والعروس والشوارع .. اسمه عبايات ؟ ويسمى ستر وحشيمه ؟


سؤال أطرحه لكم ياحضرات القضاه والساده المستشارين وأبي منكم إجابه ..



أنا كـ شاب أعزب أشعث أغبر ما قد شفت الا شغالتنا السرلانكيه .. فجأة تشطفني في الشارع بنت عليها عباية أضوق من ثوبي !!!!! وش موقفي ؟ أكيد بأعض الأرض وأتمتم قائلا : ألعن أبو الصيده يا شيخ


أنا كـ شاب أفكر كثيرا في الجنس الآخر ولا قد شفته .. أجي السوق وألقى ثلاث بنات مروا من جنبي عليهم اسم طرحه والأكمام كأنها كراسيدا باكستاني أنواع الزخارف ,, وش ترجون مني ؟ أكيد ابليس بيدق علي بيجر ويقول: دز وراهم يا مال السيل


أنا كـ مواطن متحمس و لي حق العيش في هذا الوجود المنتعش ,, أروح المستشفى أبي أعالج راسي من الصداع ,,

ثم تصادفني في ممر المستشفى فتاة عليها لثمه كأنها ناوية تسرق وعيونها كحل في كحل وش أسوي ؟

أكيد راح يزيد صداعي وبأرجع من المستشفى مصدع ألعن من قبل والبركه في عباية بنت الأجواد


لا والمشكله ,, تلقى البنت شينه وشيفه وكأن وجهها قوطي داعسه وايت بس بالعبايه قسم بالله ماتقوم معها حلا شيحه


شغالتنا مثلا .. اسمها ( راني ) .. وجهها كأنه مفك بيبسي .. وفي الليل أتجنب رؤيتها لأنها تذكرني بسوالف الجن الله يقاصرنا ويقاصرهم بالاحسان .. مرة لبست نقاب حق جدتي العجوز ,, ماعرفتها ..

قمت ألاحقها في الحوش وأقول: يا لبى قلبك يا المبرقع انت

يوم استانست وشالت البرقع وناظرتني بإبتسامتها الخاليه من الأسنان ..ضاعت علومي و قلت :


يالله روحي مطبخ جيبي مفاتيحي (( من زود الشين اللي فيها لخبطت بين غرفتي والمطبخ ))

يعني شفتوا كيف ان العبايات والبراقع قد إيش ملاعين خيـّـرررر ؟

لحظه لحظه ,, كأني أشوف الأخ مدرعم راز سبابته اللي كنها عصا موكلي ,, تفضل اسأل يا درعومتي..


والله براافو عليك ,, سؤالك جدا في محله .. نعم أحسنت من هو المسؤؤل (( صفقوا كلكم لمدرعم الدافور ))---> أما عاد هذي أسئلة مدرعم كثر لي منها أخبر أسئلته بكم الحشيش وين بتجلسون الليله وكم تدفون

الموووهم ..


دايم أسأل نفسي وانا من النوع اللي أحيانا في العصريه أجيب ترمس شاهي ومكسرات وأتقهوى انا ونفسي وندردش


بس الغريب ان نفسي من النوع الحياوي . تصدقون ماقد قالت لي ولا مرة: صب لي بياله


قبل فترة كنت جالس مع نفسي وحصل موقف رهيييب .. , سألتها : من المسؤؤل عن هالعبايات السامجه اللي انتشرت ؟ وين اخوانا اللي في الهيئة أو شااابين على مندوبنا حنا بس يا الشباب ؟ وينهم عن عبايات هالغزلان ؟


المشكله أن نفسي ما ترد لأنها مو لاقيه اجابه ..


سألت نفسي ثاني مرة : اعنبوا بليس هذولي ما وراهم أهل يقولون: هالعبايه عيييييييييييييب حراام !!

للمرة الثانيه تلتزم نفسي السكوت ولا ترد ,,


سألت نفسي ولثالث مرة : طيب وين الحمية ؟ وين أخوانهم الكبار عنهم ؟ أو بس جيدين في تحويم الحمام في السطوح؟

وللمرة الثالثه مارست نفسي السكوت وعطتني بالخامس !


سألتها لرابع مرة : طيب هالبنات وش هدفهم من عبايات الخصر واللثمه والدانتيل والزخارف؟ معقوله يبون لفت انتباهنا وفعلاَ راضين بالترقيم وتحرش هالمراهقين اللي أنا زعيمهم ؟

كالعاده لم ترد علي نفسي للمرة الرابعه وحقرتني !!!



عصبت انا ,, طنقرت ,, وأنا من النوع اللي إذا عصب على طول يحمق !! قلت :

مو معقوله يانفسي .. ياختي قولي شيء ,, بالله عليك مو حرام اللي نعيشه في الشوارع والاسواق والمحلات وعند الاشارات ,, ياهوووه تكلمي انطقي بالله مو ظلم مو حرام هالعبايات تلعن جدفنا كشباب طموح . ردي يابقرة


وفجأة .. وبدون مقدمات .. طار الحب والفستق وانكبت زمزمية الشاهي وقامت نفسي علي وسددت لي ذاك الكف وشالتني سوبرفلكس ومحطت بي ثم انفجرت تصارخ علي تقول:


(( يااخي أزعجتني ياخي من يوم طبيت الثمانطعش الين الحين في الثنين وعشرين من عمرك وانك مزعجني بهالاسئله

نعنبوا من جابك 5 سنين وانت شغال تجلدني بأسألتك لابوك لابو مخك لابو هالعبايات والبنات اللي تقول

ياابن الذين آمنوا شغل مخك خلاص وقتك تغير .. هذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..
ياخي عاصر زمانك وخلك جنتلمان او ياخي انطق في بيتكم لااعاد تطلع ,, انثبر في غرفتك الله ياخذ شكلك وفكني .,,

لاعاد تتمشى بسيارتك ولا عاد تروح دوامك ولاعاد تطب الاسواق وكل تبن واقضب ارضك ,, جعلك الماحي قل آمين تكفى يامدرعم أشطب يوزره والله انه ابلشني))



مرت خمس دقائق وانا فاقد الوعي وخايف من نفسي وقعدت أفكر في كلامها وبالذات كلمة :
إقتباس




ذا زمان البنت مو زمان الولد .. انت اللي تستحي وهي لا .. هي الجريئه وانت الحياوي ..




(( اقتباس من مشاركتها ))


قمت ,, عدلت الزمزمية ,, جمعت الحب والفستق والقريض اللي طاح ,, والتفت عليها وحبيت راسها وقلت :

سامحيني والله انك صادقه ابشري من اليوم ورايح ما هنا طلعه ووالله صدقتي في كل كلمه ,,


ضحكت وقالت لي : هههههههههه أعترف صح جلدتك ؟ صح أنا أخوف لما أكون عصبيه ؟

قلت: لا وفوق هذا والله انك حكيمه بعد .. الله لايحرمني منك ..

قالت : ولا يحرمني منك بعد أنت يا بعد روح روحي ..

قربت منها وقربت مني .. وصار مشهد رومنسي قطعه إياد مدني مهوب أنا



السؤال : هل تتفقون مع ما قالته نفسي الحكيمه ؟ أم يا هل ترى بالغت وشطحت قليلا (( انتم ماخذين بالكم من الفصحى ؟ ))


ولو الواحد منكم يا الحبايب شاف عباية أخته مخصره ومزخرفه كأنها هوندا حقت خال .. وش موقفه . يرضى ؟


وإذا - لا قدر الله - وحصل ما لايحمد عقباه وتحرش في البنت أي شاب مفتووون ,,

ليش اللوم والحكي كله على الشاب والبنت طالعه منها براءة ؟ ليش ؟ ليش؟ (( وجه واحد منهار في المحكمه ويقول: اغيثونا ))


اللي بيجاوب ..يجاوب ,, واللي مهوب يجاوب لا يجاوب ., والمثل يقول: اللي على راسه بطحاء ابن أمه يواسيها






The End النهاااااية --------------------------------------




هذا المسلسل برعاية : شاي ربيع .,, مع شاي ربيع مش ممكن تضيع


نشكر محل ابوريالين اللي في العريجاء ومستشفى الشميسي ومحل فول بلادي لسماحهم لنا بتصوير هذا المسلسل عندهم

كان معكم : الشاب الرقيق جدا ألهلالي ابو عبدالله .. رقم الجوال : ( ********* ) فقط نستقبل استفساارات الجنس الناعم .. والتماسيح ليت مايسألون أبد


تأليف : ابو عبدالله,, بطولة: أبو عبدالله .. ونشكر ضيفة الشرف: نفسي

هذا المسلسل من إخراج : زمننا المقلوب


إلى لقاء آخر سواءا هنا أو في المدرج أو العالميه (( رجعت التعليقه ))




(( منقول ))




أخوكم
جرثومه

[مليار]

أنت أرسلت لي على الخاص رسالة لبغيت تستفسر عن من المقصود وش السالفة ومنه العلماني أقولك أنت منهم بل وأقبح واحد بهم . ومن يتطاول على ثوابتنا . نكيله كل صفات خوان مثلكم يا عملا اليهود . ومشاركتك والله لأجمعهن أنت وجميع متسلل من العلمانية من المواقع الأخرى وأقتبسهن وسوي لهن موضوع ...( ولي ما يشتري يتفرق )
وبعدين أسمك طابق لك جداً (شف قدرت الله على عبيده جعلك تضع نفسك بما أنت أهله ) أنا بغيت أقولك (ياحشرة ) بس يوم فكرت قلت هذا حاط روحه أحقر من الحشرة ، ( يعني أضرب في الميت حرام )

وعلى فطنة موضوعك بايخ جدا يدل على خبث طوية ( من أظهر لنا خيراً ظننا به خيرا ومن أظهر لنا شرا ظننا به شرا ) أتمنى تصلك الفكرة .

[المهرة]

الحواااااااار مرح ورائع جدا ،، الصراحه ان كاتب المقال يمتلك روح فكاهيه عميقه.....

اما مضمون المقال وهو تساهل الفتاة في ارتداء الحجاب واتخاذه مظهر وزينه ،، فهو شئ مخزي ومؤسف جدا

لكن صدقوني اغلب هؤلا الفتيات لايعلمن ولا يعين اهمية الحجاب بسبب التربية الخاطئة التي تجبر الفتاة على ارتداء هذا القماش الأسود دون معرفة دواعيه وفوائده...

بالطبع الفتاة مذنبه باظهار زينتها امام الشباب ،، لكن هذا لايعني ان الشاب مظلوم ومسكين،، لإنه بنفسه وارادته قام بالنظر اليها -وهنا بداية الخطأ- ثم اطاع نفسه والشيطان ولحق بها ورمى كلماته المعسوله عليها ...... وهكذا

اعتقد ان الفتاة والشاب بحاجة الى مزيد من التوعية والتربية وذلك للتقليل من المصائب التي حدثت ومازالت تحدث في هذا المجال.......

وفي النهاية أحب ان اقول: على كل شاب ان يعي انه (كما يدين يدان ) و (دقة بدقه ،، ولو زدت لزاد السقاء)



شكرا لك على هذا النقل المميز ،، دمت بخير

[صافي النية]

الله يهديهن ويهدي شباب المسملين,,
بصراحة وكما قالت الاخت انه في منهن ما تعلم بخبث هذا اللباس بسبب التربية السيئة من الأهل ,,,
لكن الأكثرية في نظري تعلم تحريمه لكنها تتجاهل ذلك للفت نظر الرجال ,,,
و محزن جداً هذا الامر والله المستعان,,
شكرا لك اخي على النقل المميز وبصراحة صادق الكاتب فيما قال,,



دمت بخير..

[نـــNAــونا]

الله المستعااااااااااااااااااان حال الفتاة اليوم لا يرضي أحد


وين الآباء والأمهات

بناتكم رعيتكم وكلكم مسئول عن رعيته

[harddream67]

هههههههههههههههههههههههههههههههههههه 000000 الله يرجك نعن ابو بليسك طحت على ظهري من الضحك

[ما صيدي]

موضوع ممتع لكن طويل بالحيل..



اقول :ليش دائماً نحط اللوم على البنت

صدق بعض البنات يخطن يلبسن عبايات مخصره ومزركشه

لكن حتى بعض الشباب يخطون يغازلون صح والا لا


لا تتعلثون تقولون والله فتنتنا

انتم لكم عقول

ولو فيكم ذرة خوف من الله ما التفتوا لهن .. وإلا؟

[ضايق الصدر]

8
8

اقتباس ولو فيكم ذرة خوف من الله ما التفتوا لهن ..

ولو فيها ذرة خوف او حياء ماسووت كذا ,

بالعربي لو البنات محشمات وماشيات صح , كان الأمه والوضع بخير ,