[الصباخ]

رآها .. فتعجب من مكانها .. !!














خرج صاحبنا مع ابن خاله متجهان إلى التسجيلات الإسلامية ..
إنهما يبحثان عن زفات للزواج ..
دخلوا التسجيلات ..
وكان البائع من الجنسية المصرية ..
سلم صحابنا .. ورد عليه بمثلها ..
ثم قال صحابنا للبائع "عندك زفات للزواج !!" ..
"لا للأسف ماعندنا .. لكن تجد الزفات عند التسجيلات الفنية" ..
"يعني مافيه إلا محلات هالأغاني .. مافيه تسجيلات إسلامية عندهم زفات غيركم !!"
"لا للأسف مافيه أحد يبيع زفات بالتسجلات الإسلامية .. أنت روح للتسجيلات الفنية واسألهم"
"زين .. زين"
خرج صاحبنا مع ابن خاله متجهين إلى شارع الخبيب ..
وصلوا إلى المكان المحدد ..
صاحبنا لابن خاله "شف انزل أنت .. وأنا تراي مانيب نازل .. وشف قل له مانبي أغاني .. ولا تخليه يشغل لك أغاني .. تبين أستاثمبك !!"
رد ابن الخال "طيب .. طيب .. لا تكد أولاوه"
دخل ابن الخال المحل ..
جلس قليلاً ..
ثم خرج مسرعاً وركب السيارة بسرعة ..
وضرب بباب السيارة بقوة ..
صرخ صاحبنا قائلاً "ماتفهم أنت !! وراك صبخت بباب السيارة !! موب قايلن لك شوي شوي على باب السيارة !!"
رد ابن الخال "آسف معليش .. بس أنت لو شفت اللي شفته .. كان عذرتن على صبخت الباب"
"وش شفت أنت !!"
"شفت طال عمرك أول مادخلت المحل حرمه"
"أقول والله من الكلك أنت .. يمكن ياخبل باكستاني داخلن المحل !!"
"لا ياخي .. حرمه .. أنا شفت عباته"
"طيب يمكن تطلع مصريه أو هندية"
"لا ياخي هالبنت منا وبنا ومن بريدة بعد .. هرجه باين .. وسمعته تقول لليماني راعي المحل .. [عطن جواد العلي الجديد .. ولا تنسى تعطين راشد الماجد .. وأهم شيء عندي أبي نانسي عجرم] بالحرف الواحد قالت كذا"
"يعني أفهم من كلامك إن البنت من أهل بريدة .. وإن أبويمن مستانس وهو يسمع تطلب"
"إي مستانس ومنبسط .. تخيل البنت طلبت بس ثلاث أشرطة .. وهو عطاه الرابع زيادة مجاناً من عنده"
"الله ياخذه أبويمن هالخبيث .. يبي يجر بنت الناس .. تدري لازم نشوف السالفة وشي"
وضع صاحبنا القير على "الريوس" ورجع حتى أصبح مقابل المحل .. وإذا بالبنت تخرج من المحل وهي رافعة رأسها وكأنها خارجة من معركة وبانتصار !!
أسرع صاحبنا ليلحق بالبنت حتى يعرف أمرها ..
ولكن اختفت .. وكأن الأرض انشقت وبلعتها ..
بعدها .. إتجه صاحبنا إلى المنزل .. وهو لا يعرف ماذا يفعل ..







انتهت .



أسعد بنقدكم وآرائكم .

[وحـيــد الـجـزيـرة]

تعقيباً على موضوعك الرائع أبو ريم..

هو أن هذا المشهد الذي أحسنت في تصويره لنا...هو مانشاهده أحيانا..

ولكن بما أنك تطرقت في موضوعك للتسجيلات الفنية..هو أنه عندما نشاهد هذه التسجيلات الفاضحة..

يحز في قلبنا الغيرة على أخوننا وأخواتنا..

فلماذا لو إستطعنا الحديث مع صاحب المحل ونصحهه وإرشادهي للطريق الصواب...

أو صاحب العمارة ( المؤجر ) ونصحة والآثام المترتبة على ذالك..

[سوسنة الإمارات]

اخوي الصباخ،في كل سوق رباخ ويقول طاخ ما طاخ
موضوع رائع،والله يعطيك الف عافية

[مدحت شوقي بريده]

هلا بالبي الصباااااااااااااخ ..

يالبي .. لاعليك لاعليك .. لن تراع لن تراع ..

الله يعافيه ولا يبلاااااااااااانا ..
اجل متقضية من المحل ..

يالبي يابعد معاليق حنوتسي انت ..
بريدة مثله مثل غيره .. به الصالح والطالح .. وبه الزين والشين ..
وبه العدل والمايل ..


بس خويكم وش صار عليه لقى الشريط اللي يبي وإلا مالقى ..

ولي عودة يالبي ..

[خباب النجدي]

هذه المره اسمحلي اخي الصباخ ان انتقد بقوه وارجوا ان لا تعتب علي هل لا يسكن بريده الا ملائكة حتى انهم لا يخطؤن ويعتبر هذا الفعل غريب وجديد وتكاد تجزم انها اول إمرأة في بريده تسمع اغاني
, انظرالى بعض نساء بريده فلقد تغير لباسهن الا ما رحم ربي وتغيرت اطباعهن الا ما رحم ربي فبريده قبل 15 سنه ليست هي بريده التالية وتغيرة العادات والتقاليد واتمنى من اهل بريده ان لا يغضبوا على ما اقول فهذهي هي الحقيقة والحقيقة دائما تكون قاسية والعاقل هو من لا يغضب من الحقيقة ويحكم عقله

[التويجري]

هل القصة حقيقية أم للموضوع مغزى آخر ..؟

[تالي حياتي موووت !]

لا والله عاد قليل نعرف بنات يشتـــــــرون من التسجيلات ..

مب كله دين لا والله عشاان السمعه ..

هم يسمعون اغااني لك بطريقه ثاانيه يعني النسخ مثلاً وهذا الغالب ..

الله يهـــــــــديهن ..

مشكـور أخــوي عـ الطـــرح ..

تحياتي ..

[ツحـبـر شـفـافツ]

لاياجمااعه بصراحه معذور لو استغرب .. ترى مهما قلتوا تظل بريده محافظه مو مثل غيرها ..

يمكن لانها تحتفظ بسكان معينين مو كل من هب ودب جاء لها مثل غيرها من المدن ..

بصرااحه انا جالست البنات في المدارس والجاامعه والله ومقوله صدق قليل أشوف وحده تكون رجه
وراعية أغاني وطهبله .. ولابعد تشتري أشرطه بصراحه ماعمري سمعت وحده تقول اشتريت شريط
هو يوجد هالاجنااس لكن الاغلب زين ..
الحق ينقال انا جلست معهن ومع غيرهن وشفت الفرق الوااضح ..

بس ياشيخ انت تنقد تواجد البنت في السلسال الذهبي << شكله هو مابه غيره :D
والا خفت اليمني يهك عليه ..
لاعاد ياخي مهب لهدرجة مدمغات ويلعب عليهن ,,
مشكلتكم أخذين عن البنات انهن يتاثرن بسرعه وانهن كمخ ولا يفهمن << أعذرني على الاسلوب
من قال ترى لنا عقول نفكر بها ولنا مبادىء نسير عليها .. << مهب كالاكنق
ترى البنت فيها ثقل حتى لو كانت نص لفه بالعكس البنت تحسب لنفسه اشد من الشاب ..
حتى لو كانت ماتخااف من والعياذ بالله تخاف على نفسها وسمعتها ..
واترك عاد الخربانات ..
بس اتكلم عن هالنظرة الظالمه للبنت ..

الله يهدينا وياهم ,,

وجزيت خيرا .............,,,,,,,,, بباي ,,

_--,,’’حـبــر شــفــــاف’’,,--_

[الصباخ]

اقتباس المشاركة الأساسية كتبها وحـيــد الـجـزيـرة تعقيباً على موضوعك الرائع أبو ريم.. هو أن هذا المشهد الذي أحسنت في تصويره لنا...هو مانشاهده أحيانا.. ولكن بما أنك تطرقت في موضوعك للتسجيلات الفنية..هو أنه عندما نشاهد هذه التسجيلات الفاضحة.. يحز في قلبنا الغيرة على أخوننا وأخواتنا.. فلماذا لو إستطعنا الحديث مع صاحب المحل ونصحهه وإرشادهي للطريق الصواب... أو صاحب العمارة ( المؤجر ) ونصحة والآثام المترتبة على ذالك..

أبوعبدالله .. حياك الله ..


المشكلة ليست في كونها فتاة .. ولكن المشكلة أنه كيف وصلت الجرأة بها لهذه الدرجة !!

الله المستعان ..


بالنسبة للنصيحة .. فلا بأس بها ..


شكراً لك ..

اقتباس المشاركة الأساسية كتبها سوسنة الإمارات اخوي الصباخ،في كل سوق رباخ ويقول طاخ ما طاخ موضوع رائع،والله يعطيك الف عافية

الله يعافيك .. مع إني مافهمت شيء ..


شكراً لكِ ..

[وحيد الخلان]

أبوريم :


أجدت في طرحك وسردكـ للقصة ..



فـ والله انكـ تحزن إذا خرجت للأسواق ونظرت للتغير الجذري الحاصل .. وليته كان للأفضل والأرقى إنما كان للحطيم إلا ما رحم ربي ..


الأمر في ازدياد واضح ولا بد من تداركـ الموضوع قبل أن يقع الفأس في الرأس ..



أشكركـ ياعزيزي أبوريم ..



سلام عليكم

[الصباخ]

اقتباس المشاركة الأساسية كتبها قمر اخي الكريم الصباخ.. النقد الذي تطلبه يعني انها فكرة قصصيه..صورتها من الواقع ..وهذا الواقع فعلا موجود وموجود اكبر منه ..نسأل الله ان يلطف بنا... فإذا كنت تريد نقد الاسلوب الادبي ...فهذا ..يطول فهناك مفردات كان الا ولى تغييرها والبحث في اللغة العربية عن بديل اجمل ..وتوظيف الكلمات ..توظيف الكلمات .. لتحسين عرض القصة ..والذي فعلته انت هو ..عرض القصة.. دون انتقاء للكلمات وتوظيفها.. ثم ان هناك اختصار كثير لعدة مواقف في القصة..تحتاج الى تفصيل اكثر .. وبما انك تحب الصباخ كان المفروض ان تقول صبخ بالباب حق السيارة:D عموما وعذرا ...اللغة العربية جميلة ومفرداتها كثيرة وتركيب الكلمات .. امر سهل ولكنه يحتاج الى تجارب...وقراءة في الروايات الفصيحة ..وكتب الشعر الفصيح.. تقبل تحياتي ..واعتذاري ان فهمت طلبك خطأ... دعواتي ..ورعاك الله... . . .

أهلاً بالأستاذ قمر ..



كان بودي إنك تنقد القصة ..

إما بالنسبة للمفردات .. أو بالسرد .. أو ما إلى ذلك ..



هذه نقطة ..



أما ماتحدثت عنه بأن القصة مختصره .. وأن هناك كثير من المشاهد تم اختصاراها .. فهذا مقصود .. حتى لا يمل القارئ مما كتبت ..


أفدنا بارك الله فيك مرة أخرى ..

[جيدا]

اقتباس المشاركة الأساسية كتبها الصباخ [عطن جواد العلي الجديد .. ولا تنسى تعطين راشد الماجد .. وأهم شيء عندي أبي نانسي عجرم] بالحرف الواحد قالت كذا"

أطلع منه ياولد ,,

ماشاء الله وبكل ثقه وبرود ,,

أتوقع أنه أزداد عندها الحياء بدرجه حتى وصلت إلى هذه الحال ,,

الله يخلف بس ويصلح الاحوال ,,

ونشيد الأفراح متواجده عندنا ولله الحمد ,, وفيه يأيقاع ودف بعد ..

شكرا حبيبي ابو ريم ..

[سوسنة الإمارات]

اقتباس المشاركة الأساسية كتبها الصباخ الله يعافيك .. مع إني مافهمت شيء .. شكراً لكِ ..

---------------
ما هو بضروري الفهم اخوووووووي الصباخ،
ردك كفاية،
فيه ناس ما يفهمون ويكتبون،وفيه ناس يكتبون شغلات وما يعرفون عنها شي،والدنيا حال واحوال

[الصباخ]

اقتباس المشاركة الأساسية كتبها مدحت شوقي بريده هلا بالبي الصباااااااااااااخ .. يالبي .. لاعليك لاعليك .. لن تراع لن تراع .. الله يعافيه ولا يبلاااااااااااانا .. اجل متقضية من المحل .. يالبي يابعد معاليق حنوتسي انت .. بريدة مثله مثل غيره .. به الصالح والطالح .. وبه الزين والشين .. وبه العدل والمايل .. بس خويكم وش صار عليه لقى الشريط اللي يبي وإلا مالقى .. ولي عودة يالبي ..

ياحبيلك يامدحت ..


بريدة به الصالح وبه الطالح ..

لكن وش لون تجرأت ودخلت المحل ..



خوينا والله مادري عنه ..



كود اسأله وأشوف ..