بريدة ستي - الفرق بين بنات أول وبنات الزمن ذا

بريدة ستي (http://www.buraydahcity.net/vb/index.php)

- ســاحـة مــفــتــوحـــة (http://www.buraydahcity.net/vb/forumdisplay.php?f=2)

- - الفرق بين بنات أول وبنات الزمن ذا (http://www.buraydahcity.net/vb/showthread.php?t=265306)

والله ان حريم اول جاهلات ولا بنات اليوم وش زينهم

هههههههه ي اخي وش حاشرك خلنا نستانس
وثاني شي انت شايف ارجال الزمن اللحين؟
طبيعي يختلفون عن اول (=

وب العكس عن نفسي افضل جيل اللحين عن اول فيه تقدم
واللي يقول شغاله والالات تنظيف وسواق وتوصيلات
ي اخي مااذكر انه حرام ندلع انفسنا
> يوم قرت توصيل طلبات اشتهت المطعم وراحت تطلب

واما ب النسبه للمكياج
استانس اللحين تركو المكياج المبالغ فيه الموضه اللحين المكياج الناعم

واما القصير ي اخي اهتم بخواتك وتركنا مالك شغل ببنات الناس !

اقتباس:

المشاركة الأساسية كتبها ام الوريدات (المشاركة 3009851)

الدنيا بخير وبنات الناس بعضهن فيهن أدب وأخلاق واحترام ويخافن الله لأكن الانفتاح والتكنلوجياء هذا ماسوات والتقليد في سن المراهقة وتعدي ان شاء الله الحين كثير من البنات رجعن يطولن شعورهم الله المستعان اللهم استر علي نساء وبنات المسلمين وأصلح فساد قلوبهم أمين

:41:41:41

ماشاء الله عليييييييك
.
تبينا نطق قميص الروز والحنا والجديلة ,,,ونصير مثل الغنم لكم ...نرعى ونحصد,,,؟؟؟؟

وبعدين وع حريم منول والله من الجهل اللي بهن والغباء اعوذ بالله لو احم قلووووو هيييييي نااااااه فلانة ماغير تنحنح بصوتة وذي وذي,,,

والله من القراوة بعد..

!!! وبععدين شفناكم يارجال الحين رجال منوووول ؟!!!!!!!!!!!!!!!!

اقول اهجد بس ... اكيد عندك جنياتن مطيرات عيووونك...وبعدين موب كل البنات لا شاقن بنت شعرة طويل قالن هييي ..

لاتبالغ بس,,وتعمم على بنات العلم والكشخة

اقتباس:

المشاركة الأساسية كتبها بنت قماشه (المشاركة 3009861)

اقول اخوي ماتبي توت.....
الحين تبوننا كاملين طبخ نفخ غسيل كوي تنظيف جمال اخلاق طول شعر بياض وانتم وش تكونون ياسيدي اجل تبينا مثل أول احتريك تقول بس حطي ديرم وتحنكي وبس هذا مانقص موضوعك اخي الكريم اول شي شوفوا انفسكم وصححوا من عقولكم بعدها افتحوا هالمواضيع انا هنا اتكلم عن البعضضضضضضضضضضض وليس الكل لان بصراحه المنتدى صار غثيث وممل كله من طلباتكم يامعشر الرجال تبوننا حوريات الجنه
وبعدين علي ابن طالب رضي الله عنه قال ان اولادكم ولدوا لزمانآ غير زمانكم
ملاااااااحظه؛ انا مع التطور والتكنولوجيا ولكن في حدود الشرع
اخوي ترا يمدحون رجال الاولين وش رايك تصير منهم بس لازم ترمي جوالك وجهازك المحمول لان ماكان عندهم ...

قسسسسسم جبتية على الجرررررررررررررررح...:41:41:41

اقتباس:

المشاركة الأساسية كتبها أبوعبدالله1 (المشاركة 3009729)

أه أه ليت الزمن يرجه أو ليت ربي يرزقني زوجه بها طبع مثل طبع بنات أول

بنات أول تتزين بس لرجلها وبنات الزمن تتزين لناس أكثر من رجلها غريب أمركم يابنات وش غيركم أول ياحلاتكم

مو أنا اللي أقول الكلام هذا هذا الواقع واللي أسمعه من الناس وأشوفه بعيوني حته خواتي وأقاربي فيهم من البنات اللي كذا وأنا ماأتكلم عن البنات كلهم لا بس أقول البنات اللي كذا نسبتهم كثيره يمكن 10 %تحصل البنت اللي طبعها مثل طبع أمها للأسف الحين إذا رحت للأسواق تشوف البنت ياغافل لك الله وأما الأم مشاء الله متستره إذا خربتها رفعت الغطوه عن نقابها ........

بس ماأقول إلى الله يهدي بناتنا وبنات المسلمين

يلا خذو هذي سوايكم

بنات اول بالبيت
ماشاءلله عليهم عيني عليهم بارده تصحى من الفجر وتزين القهوى والفطور وهي الي تصلح الغدا ء وهي تمسك البيت بعد ماتطلع امها وهي الي تحط بالها على اخوانها الصغار
ولا تكلمت تتكلم بكل ادب واحترام وحياء
ولا نادت عليها امها تقول سمي وتروح بسرعه وتترك الي بيدها وكلمة امها وابوها وزوجها هي المسموعه ولا تكلمة مع ابوها وامها وزوجها تتكلم وعينها بالارض وبس تقول حاظر و سم <<<<< هذي البنت السنعه

بنات الوقت بالبيت
عيني عليهم بارده ينامون الفجر ولا يصحون غير المغرب ولا بغتها امها وتصحيها ماتدقعت وتقول حررام عليكم وماتخلون الواحد يعرف ينام بس لا دق جولها تقوم من النوم تقول مقروده وعين مقفله والثنيه مفتحه بس تبي تشوف من الي متصله وبالاخيره تطلع رساله من stc اعلان على تخفيض الاتصالات الدوليه مسكينه صحت ع الفاضي
ولا قالت لها امها زين الغدا تقول يمه خلي الشغاله انا تعبانه ابي اعرف تعبانه من شنو وانتي بس متسدحه ع اللاب أو البلاك أو الأيفون وماغيرتفتنين خلق الله بالبيبي والمسن و تسمعين لتامر حسسني وجواد العلي ولا صارت اخر اليل تقول الحين اخر اليل وتحط شعر للحامد زيد ونصه موسسيقه اهم شي انه موب اغاني شعر يعني عادي ياحليلهم هم وتفكيرهم
ولاجاء اخوها او اختها من المدرسه وميتين جوع ويبون شي ياكلونه يقولن نبي اكل تقول وش رايك اسوي لك اندومي......

بنات اول لبسهم
البنت قبل ماتعرف غير قميص باللغه القصمنجيه وان خربتها لبست للها تنوره والي تلبس تنوره هذي يتكلمون بها اسبوع ونص وعن تنورتها
ولا طلعت برا تلبس العبايه الي على الراس تشوفها ماتعرف وش الي داخلها لا تشوف عيون ولا تشوف ايدين ولا غيره ماتشوف غير قطعة اقماش سوداء يالبى هذا الستر مو الحين

ولا طلعت ماتمشي غير بجنب الجدار ولا شافت رجاجيل توقف لين يممشون من الحششمى والحيى الي فيها

بنات الوقت لبسهم
اخ من لبسهم تلبس لك هذاك البرمودها الي من كثر ماهو ضيق تشوف البرمودا يبي تششقق ولا تلبسك هذاك البس للزواجت تعال وشوف بس اذا ماكان فوق الركبه ماتلبسه مدري وش يحسسن ولا بالبيت تعال وشوف البس تشوفها ماتبي تفكر فيها عشرين لون لا بسه ولا لبست فستان بزواج ماتلبسه مرى ثانيه تقول شافوني فيها الحمدلله والشكر بس
وتعال وشوف العبايه بس تلبس لك هذيك العبايه الخفاش والبشت والي على الكتف وهذي الي ع الكتف تعال وشوفها مافي غير راسها الي باين تقول رسمه وكل يوم لاها عبايه الزواج لله عبايه المدرسه لها عبايه والمناسبات للها عبايه والسوق وما ادراك ما اسوق تلبس للك العبيه المخصصره الي كاشفه كل جسمها بعض البنات مو كللهم ولا جاك احد غازلها تقول بالله انت ماتستحي ياقليل الادب منت مرربي هو الي موب مربى
ولا طلعت للسوق تتحط المكياج تقول رايحه للزواج ولا طالعت بمكياج اسمه مكياج السوق حتى السوق لله مكياج
ولالالا مشت بالشارع تقول شارع ابوه

بنات اول زينهم
لا تزينت حطت للك هذا الكحل واصلن مافي غيره

بنات الوقت زينتهم
حدث ولا حرج الشفايف لها زينه العيون لها زينه الاخدود لها زينه والاذان الحين لها زينه بعد الحواجب لها زينه الرومموش لها زينه
ولا بغت تطلع للمناسبه تتقعد لها ساعه عند المرايه امموت واعرف وش تسوي ولا فتتحت شنطتها تحصلها كلها مكياجات وثلاث امرايات ليه ما ادري
ولا حطت المكياج تحط 2 كيلو نص على وجهها والنص اباقي تحطه لوصلت ولا شفتها بالمكياج تتذوب عندها بس لا غسلت وجها من المكياج تنزل راسك من جكارتها بعض البنات موب كلهم

بنات اول قصاتهم
البنت قبل ماتعرف لا قصه ولا غيرها شعرها يوصل للنص ضهرها وماغير تحط عليه من الزيت وتشمسه بالقايله لين يصير يابس تقول كاب عليه بسي

بنات الوقت قصاتهم
اخ من قصاتهم كل يوم للهم قصه ولا تعال لا شافت ممثله قاصه قصه جديده وهي ثاني يوم رايحه للكوفيرا تقص ولا شافت للها صوره واخذت الصوره وراحت تقول قصي لها مثل ذي ماتدري هو يصلح على خشتها ولا اهم شي تقص وتعال شوف وجها تقول قطو منخرع
ولا في قصات جديده وهي قصة الولد قصدي قصة البويات الي طالعين فيها واليهي الشعر القصير تشوفها وهي جالسه بين اخونها ماتقول هذي بنت ه باقي بس لها شنب
(((ولا شافت وحده شعرها طويل تقول وعوه شوفي شعرها طويل قديمه ذي))) ركزو على اللي بين قوسين هذا اللي خرب بناتنا البنت اللي تقول الكلام ذا ماتدري إن البنات القديمات أحلا منها ولا بالخيال يكفي إن بنت أول تعتمد على الله ثم أهلها وزوجها مو على كلام الناس : 12

عزيزي انت شكلك شايل على بنات هالوقت وناسي ان الإختلاف بين الإجيال شيء طبيعي فكل جيل له سماته وطباعه الخاصة اللي تميزه عن الجيل اللي قبله واللي بعده وكل جيل له مميزاته وسيئاته
وفي المقابل حنا بعد نفتقد رجال زمان لأنهم غيييييييير بكل شيء واتمنى ماحد يتضايق من رأيي ..

اقتباس:

المشاركة الأساسية كتبها { صوت بريدة } (المشاركة 3009814)

أنا نفسي ادخل عقل بنت من بنات ( النيدو الي بعهد الأيمو ) هاليومين الي طالعات وأعرف كيف طريقة تفكيرها ..

بنات كلمة توديهم وكلمة تجيبهم ، بمجرد ماتشوف مسلسل تعيش معاه أحلام ، بمجرد ماتشوف بيت شعر تتخيل أنه مقصود له ،

مسويات أن وجودهم في زمن لايليق فيهم ، وأنهم المفروض ماولدن الا بعهد 2099 عشان هالزمن ظلم × ظلم ، وكل حياتهن ( فضفضة × فضفضة )

المشكلة أن مشاكل الحريم أصبحت ثلاثة أرباع المجتمع ، لدرجة أشك أن إنتحار هتلر كان ردة فعل ( أنثى )

لاااا .. ويحومن تسبدك لاشفتهم بالتلفزيون ولا في قصصهم بالإنترنت سواء ، يجلسن يسردن عليك قصص غريبة وعجيبة أجل مره من المرات أقرى قصة لبنت كاتبه ( وبدأت ألسحب تنجلي فوق سمائي ).. ياشيخ هذا وجهي إن كانهي ماسرقتها من سوالف حسن كراني ..

للتوضيح بس : ترى تقصد أنها كانت مهمومة وفجأة راح الهم ..

ولا تعال شف اشكالهن ، أظافرهن الي 24 ساعة معهم المقلم << ترى كذا يعني نعومات وبنات عز << أوم الطفش

ولا بقصات شعرهن الي لو ترمي قطرة ماء أنتفش .. حتى تواقيع بعضهن يقالهن مقطعات شوارع لوس أنجلوس ..

أووووووف .. والله يانا أمرض لاجتك بنت مسويه مثقفة وفاهمة وغير تلاقيها تراددك وشوي وتهفك بالكيبورد الي تكتبه
، والمشكلة يطلع الموضوع عن ( التفحيط ) يعني ماله دخل ورازه خشتها ،

أنا والله ياجماعة الخير أني بديت ( أقهقه ) نفسي عن الزواج والسبب حركاتهن وقصصهن الي نشوفهم كل يوم والثاني ،

وأتمنى والله أمنية من الإدارة ، أنها تضع موضوع مثبت عنوانه ( إلى هنا ويكفي عبث يا أنثى ) ..!!

خلينا من الطبخ ياصاحب الموضوع عشان نصف الي يبي يردن عليك أنا متأكد

جملتهم الشهيرة ( أبوعبدالله ، أنت تفكر ببطنك ) !!

يعني دام البيت الحين فيه ( شغالة + مربية + سواق + الطلبات توصلك لحد البيت من موصلي الطلبات + أكثر الطلبات أصبحن من المطاعم من غداء وعشاء وفطور ، + الات التنظيف من غسيل صحون وغسيل ملابس = صارت اتومتاتيكياً يعني مايحتاج وجود الأنثى ) = اجابتي الصريحة والواضحة والي مايختلف عليها أحد ( وشتبين أكثر )!!

تصدقون ياجماعة الخير ، حتى الله سبحانه وتعالى خصص الأنثى في أشياء مستحيل يخصصها بالرجل وكرمها وعطاها الحرية ، ومع ذلك تطلع المرارة للرجل وكل تفكيرها بالحياة ( كيف تحجب ابتسامة الرجل ) !!

مانقول الا ، الله يصلح الحاااال

لا تعلـــــــــــــــــــــــــيق

ماتلاحظون دايم مواضيعه عن البنات وكااد وانااجزم على ماقالت الاخت اكيد عندك جنياتن مطيرات عيووونك

اقتباس:

المشاركة الأساسية كتبها سر الوجود (المشاركة 3014637)

ماتلاحظون دايم مواضيعه عن البنات وكااد وانااجزم على ماقالت الاخت اكيد عندك جنياتن مطيرات عيووونك

:41:41:41

لان ماوراهن رجااااال صح....الله يرحم الحال...ومب كل البنات,,وحتى هالعيال الي كل همه تفحيط ولبس صايع وافلام اباحيه وسفر للخارج ودخان واستراحات كله بلا تقل داخل مرقص الله يكفينا الشرررر...وان شاءالله انهم قليل....الله يهدي بنات وشباب الامه.....

اقتباس:

المشاركة الأساسية كتبها بنت قماشه (المشاركة 3009861)

هههههههه قسم انك رررررررررهيبه:41

*

ما زال في بناتنا الخير الكثير

وفي البيوت شقائق الرجال أسأل الله تعالى أن يرزقهن ويستر عليهن

*

اقتباس:

المشاركة الأساسية كتبها ماعبركـ لاتعبرهـ.., (المشاركة 3014340)

حريم متول بهت الدين والخلق الرفيع والسنع والمعرفة ولخرجه تقوم في شغل البت وتخيط ملابسه وملابس زوجه وعياله وما تحتاج لحد الله يغفر لهن ويرحمهن وبعضهن داعيات معهن علم وحكمه وبصيرة شفت جداتي وأم زوجي زاهدات دين وخلق وعلم الله يرحمهم ويجمعنا بهم في جنات الفردوس الاعلا ووالدينا وذريتنا وزواجنا والمسلمين والمسلمات والمؤمنين والمؤمنات الإحياء منهم والأموات أمين

الحنين للماضي طبع بشري لانه مرتبط بالطفوله والطفوله احلى مرحله يمر بها الانسان ( لاهم ولا غم ) ،،،

وكل انسان في الكره الارضيه يحن الى ماضيه ويخاف من مستقبله ويعيش ازمىة حاضره ،
واذا كان هذا من الطباع البشريه الغالبه فلايمكن لنا ان نجعل الماضي دائما صواب وخير وبركه ولايمكن ان نجعل المستقبل شر وبلاء وفتنه .

كثير من كبار السن يعيشون ازمه (الاغتراب) وهذه الازمه خلاصتها عدم التأقلم مع الحاضر بكل انساقه وقيمه وعادته ،

دعنا ننظر الى المساله من جانب الكاس الممتلي او بعين ايجابية او منصفة على الاقل
بنات اليوم يعرفن الصلاه والوضوء والطهاره في السابق تحيض الفتاه ولاتعرف ما الواجب عليها بل بعضهن لاتحسن الصلاه ولا الطهاره،
بنات اليوم يعرفن ( فن المعاشره الزوجيه ) وبنات الامس ( حمار كده) شغل دائم في المزرعه ولك ان تعجب ان بعض المزارعين كان يتزوج وقت الحصاد اكثر من امراءه لاجل العمل في المزرعه ( حج وقضاء حاجه ) زوجه ويد عامله فاذا انقضى موسم الحصاد (طلاقها ).

كانت الفتاه تزوج لانها (شوقرديه ) تشتغل تحلب البقره وتحصد البرسيم وتطبخ الطعام على الكرب من العصر لايهم شكلها قصيره اوطويله شوهاء او جميله عرجاء او محروله اهم شي ( تكككككككد ) وكانت الفتاه تعاب لابخلاقها ولا بجمالها ولا بادبها بل لانها ( رفلا او عجازه) فقط لان دينهم العمل
كانت الفتاه بالسابق غير مستقله بقرارها ولابنفسها ومصيرها ليس بيد زوجها بل بيد ( ابو زوجها وام زوجها) فلو كانت تحمل زوجها على كفوف الراحه ( يازبده لاتموعين ) بلهجه العراقيه ( يازبيده لاتنكتين ) واخطاءت في حق ام زوجها او لم ترتح لها فمصيرها ( بيت ابوها ) لانها تزوجت ثلاثه ( ابو الزوج وامه والزوج نفسه ) لان المزرعه هي مصدر الرزق وهي بيد ابو الزوج والقاعده تقول ( الى ياكل لقمتي يسمع كلمتي )
ارجو ان لانكون متشائمين ورسولنا يقول ( امتى كالغيث لايعلم الخير في اوله ام في اخره )

ولك خالص تحيتــــــــــــــــــــــي^^