|
قـــــصـــة تـــوســــع الــصـــــدر
السلام عليكم ورحمة الله وبركاته تحية طيبة عطرة للجميع... في يوم من الأيام دخلت للبيت _تافلن العافية_ من شينن صار لي... من اللي ما لا يسلم منه إلا النادر _وهاذي طبيعة الدنيا_ دخلت وإذا جدتي جالستٌ بفناء الدار قلت: السلام عليكم. قالت : وعليكم السلام يا وليدي . جلست ساكت شوي , وأطالع بالسماء شوي... قالت : وش بلاك ؟ وش إهنا ؟ وراه ماتحكي!! قلت : من فجر الله روحه وجيه وتاليتها خسارة !! قالت : عندي يا وليدي قصة أبقوله لك . قلت : عساها قصيرة وتضحك ؟ قالت : اسمع به بزمانن مضى رجل من الرجال لكنه أسود عرج كريم عين وشعره عكاريش وحالته حاله ما أحد يبيه وهاذي حكمة الله بخلقه لا يقدر يسني مع السواني ولا يروس مع اللي يروسون ولا يبني مع هالي يبنون ولا يسرح بالغنم حتى المسكين وده يترزق الله ويعرس مثله مثل الناس راعي طموح لكن ما هنا حيله... نوبتن يشحذ ونوبتن يتلزق باللي عندهم عزيمة وعلى ها السيرة ماشي بيوم من الأيام قاله واحد راين سديد قاله: إبد جمع زبايل الديرة بقرش آخر السنة من كل واحد وأكلحين القرش يساوي والله أعلم عشرتريل وحط الزبايل بآخر الديرة _يعني إشتغل بلديه_ وبعدين الناس يدرون إنك ما هنا شيء . والناس حبيبين ويبي يساعدونك إن شاء الله رفيقنا تشيوى الدراهم قرشن بالسنة !!! لكن أزين من الشحاذة و الكسافة ولا بالفرق راح وقال لإمام الجامع قل للناس أبجمع زبايلهم بقرش وأحطهن بآخر الديرة اللي وده بعلمنا قال الإمام للجماعة ووافقو لأن هال القرش مهب شيء حتى ماهنا أحدن لهال الفقير تعاطفوا معه الجماعة ولا خالف أحد وفرحوا إنه لقى له شغل -وإلا ماهنا زبايلن تذكر من أول- بدأ الضحى يدور يجمع ها الزبايل ويحطهن بآخر الديرة وإشتغل كم سنة على ها الطريقة وما جاه من قرش إلا ضرب عليه عشرين عقدة وغباه. مرت الدنيا ... وقعد له مره وعد ها القروش ولاهن يوسعن الصدر فرح بهن واستانس ومار يفكر يعمر بيت _ عاد الله أكبر وشن بيوت من أول _ قال للإمام : إن شريت أرض قضن قروشي عن العمار , وش الحل برايك ؟ قال الإمام : إعمر بآخر الديرة ما يمك أحد _أهههه_ عند زبايلك!! جازت القكرة له وبدأ يدور أزين المحلات عند محل الزبايل جزم على محلن زوين إيه إيه لكن وين اللي يعمرون؟ دور بعض الزقرت اللي يشتغلون بالجازة_الجازة هي أن يعمل عندك الشخص مقابل أن تضمن له أكله مجاناً_ لقى اللي يسدون , وقوم حجرة وقضن القروش وقف الشغل لمين يجمع من ها الزبايل ما يقوم الحجرة الثانية جمه اللي يسد وناداهم مرة ثانية لما عمر حجرتين وجط لهن سور واحد المراد إنه قضى العمار الضحى وغداء اللي إشتغلو , وأكلحين الغداء قبل الصلاة ونام بالبيت الجديدة فرحنبه وإلى بغض اللي يشتغلون عيار وضحكة لربعه مثل أغلب الشلل , كتب على السور هماه طين وتوه مزين { يـرزق مـن يـشـاء حـتى زبـالـه } مستحقرن ها الزبال إن له بيت , لكن لم ينكر قدرة الغظيم الأغظم . قام من النوم رفيقنا يام قربت الصلاة وراح للمسجد صلى وعلم الجماعة إن بيته قضت ... رجع للبيت وقبل يدخل شاف هال كتبة وقف يقراها وضحك ودخل وجاب ماء ورش اللي تحتها وكتب { مـن لـه رزق لا يـمـوت حـتى يـنـالـه } ضحكت أنا كثيراً من طرافة هذه القصة الجميلة ذات المعاني الرفيعة . قلت : صارت يـرزق مـن يـشـاء حـتى زبـالـه مـن لـه رزق لا يـمـوت حـتى يـنـالـه قالت يوه: ثم صارت هال بيت مشهورة عند المغثة والكسافة... والله وأنا أمك مهب مضيع الناس , ولا تركهم ما يدري وش اللي يصير لهم , والعبرة وأنا أمك باللي قدام اللي يبي صدق شغل وتعب عسى الله ينجينا ووالدين وجميع المسلمين ......... |
وين شبابنا عن هالقصة يعطيك العافية ماقصرّت لو إني تعبت بالقراية شوي |
والله ما ذبحنا إلا هالقصة وأمثالها :cool:
قل لجدك الله يخليها لك أن النفط يا جديدتي يباع الحين 102دولار والدولار وأنا حفيدس يسوى 3.75 ريال وفوق هذا يا جديدتي ترى دولتنا الله يعزها ولا يعز عليها تبيع باليوم 100 مليون برميل والحظ الأوفر للبنان والأردن . وقلها الله يرزقها برك .. دولتنا وولاة أمرنا فيهم الخير والبركة ولكن يبدر منهم تقصير والكمال لله تعالى .. ولا ترى يا جديدتي لو تدرين أني لو ابفتح محل شفت نجوم الظهر من البلدية عندنا وموظفينها الي إن كانوا يصلحون لشيء فهم يصلحون يبيعون برسيم كان مهوب هذا هرجتس . وغير هذا وذاك لو ابتزوج كان لازم أدور لي عزبة حول الموت علشان أورثها وأتزوج بنت حلال تناسبني كودي أسدد قيمة الزواج في ظل غلى هالاسعار . ولا ودي أضيق صدرتس يا جدتي بطاري الخمسة بالمية وأقولتس أن عمان وهي مافيها إلا بعارصى من غير حقران لخلق الله رفعت 45% . والله يا جدتي أنتس غالية علي وأني أحب قصصتس هذي مير الزمن تغير وصار الحليم حيران . |
ألف شكر لك ياسامي بريدة... والله يعين الجميع يا فهدنا لا فهد بريدة بس
|
القصة حلوة لكن تبي ترجمة لغير القصمان
وأيضا القصمان من الرجعة التالية مايفهمون بعض المفردات |
تكلم بلغة القران اسلوب العوام مايفهم ابد
|
عفواً يا زمن الصمت وللدكتور المتفائل القصة سقتها كما سمعتها لحفظ اللفظ الأصلي ذا المعاني ال...
|
أي معنى الله يرحم والديك ومعهم جدتك
|
يحبيل العجز وقصصهموالله مفيده جزاك الله خير
|
مشكور سامي بريده على هالقصيصه
|
ألف شكر وتقدير على مشاركاتكو ياشباب
|
اقتباس:
يا حبيلك يادحيم الفزعة أثر قلبك معي أول واحد يصير قلبه معي 7 7 لا يزعل عليك القمة أنا أعتذر لك منه وإن شاء الله بيقبل العذر والعتب على النظر والعجلة |
نعم والله (ان الله هو الرزاق ذو القوة المتين)
|
من أخذ قلبك ياسامي يتهنئ فيه , وشكر يا لانا ( توقيعك حلو...) |
| الساعة الآن +4: 07:40 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.