|
عجوز الفرنجه وحب الرمان
السلام عليكم ورحمة الله وبركاته http://www.m5zn.com/uploads/2010/9/2...cd6bpam9dp.jpg اليوم مر علي موقف ذكرني بسالفة صارت لي يوم كنت في بلاد برا في الغربه ويالبيه يالغربه في بريطانيا الحمد لله على كل حال بس الموهيم قعدت في بريطانيا اكثر من سنه واذتكر اول ايامي هناك كنت ساكن مع عائله هي موب عائله عائله لا هي كانت باربرا وانا وقطوتها كانت ثالثتنا باربرا مره كبيره بالسن تقريبا عمرها 55 سنه وعيالها كبار وكل واحد منهم بديره المهم كنت ساكن عندها اجباري لين احصل لي سكن خاص مستقل وطبعا لما تسكن عند عائله هناك يكون السكن شامل الفطور والعشا اما الغدا دبر عمرك باربرا كان دكتوره في مستشفى المدينة اللي كنت ادرس به وكانت حليله معي ترحمني من ركوب الباصات خاصة ان الجو كان موووت بررد وكانت تقولي انا اوصلك معي لان طريقي وطريقك واحد قلت لها اوكي قالت بس على شرط تدبر عمرك بالفطور يعني زينه انت منب فاضيه ازينه لك انا اللي علي اوفر لك الفطور حليب بيض جبن زبدة كورن فلكس خبز يعني الحاجات الضرورية وانت كل اللي تبي طبعا كان ذاك الوقت الشمس تغاب الساعه 4 العصر ليل دامس لين الساعه 8 الصبح يعني تنام من 7 تقوم انصاص الليول شبعان النوم الموهيم قمت من النوم مره وقلت خلني افطر معي وقت قبل تصحى باربرا ورحت للمطبخ وقعدت احمي توست ويوم فتحت الثلاجه باخذ الحليب ناظرت بصلاحيته ولقيته منتهي من امس قلت ملعونة الجدف عجوز الفرنجه تبي تسممني وتقضي على الاسلام من بعدي الله يخلف بس اخذت الحليب ورميته بالزباله واكتفيت بالشاهي مع الفطور ويوم قامت باربرا راحت تبي تفطر وقعدت تصارخ تنادين جيت لمه خير وش فيه قالت وين الحليب قلت له من زين الخشه بعد تنشدين رميته منتهي صلاحيته وراحت ولقطته من الزباله وقالت ان رميت شي ثاني مره برميك معه قلت افا ياباربرا وش هالكلام شكلك ولادة بالمستشفى موب دكتوره قالت ياثور يامتخلف افهم وش معنى التاريخ اللي محطوط همن تفلسف قلت مايبيلها معناته انتهت صلاحيته وبيجيك تسمم لو شربت او اكلت اي شي منتهي صلاحيته لو بعدها بدقيقه قالت ياثور تاريخ انتهاء الصلاحيه مو معناته ان الاكل او الشرب ماعاد يصلح للاستخدام لا هذا معناته ان التاريخ هذا هو اللي بعده ماتضمن لك الشركة المنتجه لهالمنتج ان تكون الجوده والطعم نفسها بوقت تعليبه قالت لي هذا شي علمي وموجود وتبي اجيب لك ادله تثبت هالشي جبتها ووريتك شف وانا عمتك الحليب اذا كنت حاطه بالثلاجه زين معك اسبوع بعد تاريخ نهاية الصلاحيه تقدر تستخدمه بامان حتى تحس بان ريحته او طعمه اختلف عليك وقتها توقف عن استخدامه الجبن عندك من 10 الى 14 يوم تقدر تستخدمه بعد انتهاء الصلاحيه وانت مطمئن حتى يختلف عليك الطعم المايونيز مثل مايونيز كرفت عندك شهر كامل بعد انتهاء الصلاحية اذا محطوط بالثلاجه ومافتحته ولامره ومعك 3 شهور بعد انتهاء الصلاحية اذا كنت فتحته وحافظه زين بالثلاجه طبعا هذا الكلام من شركة كرفت نفسها تقول كذا الزبادي معك من 7 الى 10 ايام بعد انتهاء الصلاحية اذا محفوظ بالثلاجه تقدر تاكله وانت مطمئن البيض معك من 3 الى 5 اسابيع بعد انتهاء الصلاحيه اذا كان محفوظ بالثلاجه تقدر تاكله وانت مرتاح البال طبعا انا ماصدقتها لين شربت كاس كامل من الحليب اللي انا رميته قدامي وخلته بالثلاجه لين خلص بعد يومين وقتها اقتنعت بكلامها الموهيم اليوم قمت اصلي الظهر وقالت امي جب معك قشطة المراعي ترا مابه قلت افا يوم الاثنين جايب 6 حبات وين راحن ماكلنا الا ثلاث وين راحن الباقيات قالت رميتهن ان الشغاله تقول انتهت صلاحيتهن قلت لا والله انا اللي برمي هالشغاله مثل مارمتهن وقلت له ياميمتي ياحب الرمان الموضوع موب مثل منتي فاهمه لا وبديت اتفلسف عليه مثل ماتفلسفت على عجوز الفرنجه باربرا وقالت ياوليدي طعن وجب جدد ولاتكثر حتسي قلت طيب بجيب وامري لله وجبت القشطه وقعدت ابحث بالنت وتفقعت عيوني وانا ادور واغوص ولقيت ان كلام باربرا صحيح 100 % والله حنا شعب لكم علينا وياكثر الاشياء اللي انرمت بالزباله وانتم بكرامه بسبت ان تاريخ الاكسباير او انتهاء الصلاحيه انتهت وطلعت بمعلومه الا وهي ان هالتاريخ اللي هو انتهاء الصلاحيه او بعض المنتجات يكتب عليها يفضل استخدامه قبل هذا التاريخ المقصود فيه انك ياراعي البقاله او السوبرماركت اسحب المنتج من على الرفوف عند وصول هذا التاريخ لانه ممكن تكون الجوده اقل مما يجب وزبدة الكلام اذا جا وقت السحور وودك تشرب لبن ويوم ناظرت ولا صلاحيته منتهي وانا كنت حاطه بالثلاجه اشربه وانت مطمئن خاصه اذا كان الطعم ماتغير وذلك لانك مافي امل تلقا بقاله فاتحه واصلا مافي وقت والاهم من ذلك ان الوضع طبيعي ومافيه خطورة ابدا والله من مره ومره اكلنا او شربنا شي وبعد ماخلصنا اكتشفنا ان صلاحيته منتهيه وماجانا الا العافيه ولله الحمد اتمنى ان الموضوع يكون مفيد واللي عنده علم لايبخل علينا والل استفاد يدعي لنا واللي ماستفاد لايدعي علينا والسلام عليكم ورحمة الله |
والله فكرة إنتهاء الصلاحية ، تدخل الرأس بس تبقى التجربة ، المشكلة احيانا تصاب بتسمم ثم تجلس مريض أياما بسببه ، ثم على ما قال المثل العامي اللي تقرصه الداب ( الثعبان ) يخاف من الحبل
أنا مرة أكلت كيك من البقالة أظنه كيف أمريكانا منتى تاريخه وأنا ما دريت جاني غثيان بعد نصف ساعة تقريبا واستفرغت والحمد لله ما ودك توهق بالتاريخ إلا الحاجات الناشفة هي التي ما يهم إنتهاء الصلاحية |
قصه حلوه ومعلومات جديده
بس اذا مت انت وباربرا السبب:092: |
حلو معلومه جديده علي
مشكـــــــــــــــــــــــــور...<< |
مشكور..
الصراحه اول مره اسمع به!! |
والله انك صادز ياما اكلنا واكلنا ولا ندري الا منتهي :confused:
ونفس الحكايه قبل لانستخدم الشي شفناو منتهي جدعناو :oo يعطيك العافيه ع الافاده :41 لك>>(f):f: |
اقتباس:
بسبب تلوث المكان او الادوات او الايدي المستخدمه في اعداد الطعام سواء في البيت او في المطاعم وبالنسبه ليومك اكلت الكيك وجاك غثيان فيمكن الدعوى نفسيه يوم دريت انه منتهي الصلاحيه مسكت مع مخك الا تستفرغ ولعله خيره والحمدلله ع السلامه |
اقتباس:
اما ان متي لاسمح الله فشهيده باذذذذذذذذذذن الله |
اقتباس:
عندهم حاره قطاوه حاره كلاب وانتم بكرامه |
اقتباس:
|
اقتباس:
تصدق عاد كانت باربرا تقولي ياهذا الله ماخلق خشومنا بس عشان نتنفس بها وبس لا هذا نعمه كبيره استفد منه بكل شي ومنها انك تعرف الشي الصالح والفاسد بمعنى قبل تاكل او تشرب شي شمه قبل واذا ريحته طبيعيه فانتقل للخطوه اللي عقبه وتطعمه اذا اوكي ابلع وماجايك الا العافيه وقبل كل شي الشوف بالعين اول ماتستكشف به يعني لو شفت عفن والا تغير باللون حط رجولك وهج ومشكورين على مروركم ومشاركتكم والله يعطيكم العافيه |
اقتباس:
أولا بارك الله فيك أنا لا يمكن أكل شيء منتهى تاريخ و أنا أشوفه بعيني إنه منتهي لكن هاك اليوم نسيت أنظر للتاريخ . ثانيا : إني يوم أكلته ما هو على بالي أي شيء عن الأكل نهائيا كنت جالس مع الإخوان والسواليف تدور بالمجلس ثم بدأت أناظر الواحد أثنين وبدأت أشوف الشخص يتحرك من مكانه وهو جالس ثم قمت وخرجت إلى الشارع ومشيت مسافة 500 متر قلت لعله يذهب ما بي من حومة كبد يوم شفت الدعوى كل ماله وتزود أستفرغت والحمدلله بدأت أفكر وشو اللي أنا أكلته ثم جاء على بالي الكيك لأنه أخر شيء أكلته ثم ذهبت أنظر بالعلبة وهي علبه قصدير كيف أمريكانا وإذا هو منتهي له شهر تقريبا |
اقتباس:
وزين اللي جت على كذا والحقيقه ان الكيك مثل الخبز تقريبا يعني لو الخبز محفوط في الثلاجه زين فاكيد ماراح يخرب لو تحميه بعد مدة طويله لكن الكيك مثل ماهو معروف ينحط على الرف غالبا وبدرجة حرارة تساعد على التلف يعني اتوقع منتهي صلاحيته لها شهر اتوقع بيكون طعمه غريب شوي يعني محرز مدري محزر خخخخ على كل حال هذا موقع متخصص بهالموضوع وتقدر تعرف منه المزيد بخصوص موضوع انتهاء الصلاحية بس عيبه انه انقليزي وتقدر تكتب اي نوع من انواع الاكل والشرب وبيعطيك معلومات عنه http://shelflifeadvice.com/ |
أنا مستحيل أرمي الطعام حتى يتغير طعمه
لأني ماكد شفت التاريخ أصلاً أو بالأصح نادر أشوفه..! والحمدلله , ماشفت شر على أني حساسة من هالناحية جزاكم الله خيراً |
| الساعة الآن +4: 02:54 PM. |
Powered by vBulletin® Version 3.8.6
Copyright ©2000 - 2025, Jelsoft Enterprises Ltd.