[مدحت شوقي بريده]

.

لاإله الا الله .. سبحان الله العظيم ياهيلة المحمد ..
من ياعي لتس .. مبطيه عنتس يادافع البلا من يوم اخذتي رجلتس هالتالي ماشفناتس ..
يوم هاك الحبيب الأول .. وانتي كل يوم نشوفتس .. وهاللحين لي سنتين ماشفتس ..


زاد يوم قالت لي بنتي نوال .. هذي هيلة المحمد ماصدقته ..
بس يوم سمعت هالخنة اللي بتس عرفتس ..
ايه وشلونتس بشري عسى الله رزقك بعيال ..


اقول ياخاله .. انا طالبتس طلب .. وتكفين لاتردينن ..


ايه .. وماشاء الله .. وش الطلب اللي تبينه من ..


ابي المكينه اللي عندتس مجدوعة من سنين ..
خابرتس ماتبينه ..


ايه .. ايه .. ايه ..
<<((== وجدتي موضي تقول ايه وهي تقشقش بيده عودان وقشور فصفص من الفرشة ..


تبين المكينة حقـتي .. واثرتس زاهمة تبين بس المكينة ..
وانا احسبتس ولهتن علي ..

اقول هــه مير .. والمكينة خربااااااانه ولاتنفع ..
ولا ابيع شي بوه ريحة ( بعلي ) ابو سليمان ..


مهوب بغلي .. ياجعلتس البغل اللي يتودس بطنتس ..
اقول بعلي بعلي يعني زوجي ابو عيالي يامال الجنة ..
روحي بس يالله ماعندي شي للبيع .. مع السلاااااامة ..


****************




وراتس يمه .. وش بتس اليوم تهوشين وتلجلجين ..

ياوليدي من اليوم وهالتليفون .. كل شوي داقتن علي وحدة تنشدن عن هالمكينة ..
مادري وش جايهم عليه ..
ياوليدي حتى السودانية حقت الحناء زاهمة تقول ( دايرة المكينة )
قلت له لا المكينة منقطع سيرة .. ومهيب تدور عساتس الدورة ..


مير اغديك تروح لبيت الدرج وتجيب هالمكينة اشوفه ..
شفه اللي عليه صورة ( كلب ) لوه شوشة ..
مبطيتن عنه لاتصير بعد جادعته هالشغالة ..
بس وشلون تبي تدخل مع الباب يالدربية اخاف تنشب ياهالبرميل همن من يطلعك فرقعين جدي ..


لا يمه انا ادخل وأجيبه .. الباب مقلوع .. بعدين هذا ( اسد ) مهوب كلب لوه شوشة ..


إيه .. هاته بهذا بس .. الله المستعان .. تذكرت سراويل جدك سليمان ..
عاااااد تصدق اني من يوم اخذت جدك وأنا حافظتن الشعار حق جدك ..
دايم يقول .. ( تعددت السراويل .. والربقة واحدة )
اذا انقطع السروال فكيت هالربقة هالمغاط .. وخيطته بهالمكينة على سروال ثاني ..
الين مات .. عقبه جدعنا السروال .. والربقة ربطة به مفتاح البسطه ..




****************





اقول يمه .. عااااااااد تدرين وشواله هالحريم يدقن عليتس ..
يبون هالمكينة .. يقولون ( الزئبق الأحمر ) اللي به .. علشان يآخذونه منه ..

وشو الزئبق الأحمر ياوليدي ..

الزئبق الأحمر .. هذا مثل اللي يجي بمقياس الحرارة .. بس هذاك ابيض واللي بالمكينة احمر ..

ايه عرفته اللي بمقاس الحرارة .. .. هاك اللي تقول ( سعبول ) ماغير يرقى وينزل ..
انا كل ماشفته حامت تسبدي ..
اتذكر سعابيلك اللي كل ماوصلن الأرض تشفطهن همن يرقن ..


طيب يمه ماأحد قالتس شغليه وحطي الجوال عنده ..


ايه الا الا ..
انا اقول ورى مزنة البراهيم تقولي .. شغليه وحومي عليه وانتي مشغلتن الجوال ..
اذا راحت الأبراج فتراي ابيه .. واذا ماراحت فخليه عندتس ..

قلت له اها بس اقطعي وأخسي .. وش احوم عليه .. ماتبين البس حرامي بعد ..
والله عااااااااد لو هي الكعبة علشان احوم عليه ..




****************


ياميمتي .. يابعد معاليق ركبتي .. هذولا نااااااااااااس الله يخلف مير ..
من زود الفراااااااااااااغ صارو يدورون أي شي يشغلون أنفسهم فيه ..
ياميمتي حطي عقلتس براستس واتركيهم .. واتركي هالخرابيط ..

اجل نااااااااااااس لك سنين ماسمعت اصواتهم .. يوم جاء طاري هالمكينة قعدوا يدورن بعض ..
ناسين بعض .. ويحركهم سبب تافه ضحك العالم علينا ..

اقول يمه .. الظاهر إن حنا شعب ( بدون مكينة ) ..

ابدخل هالمكينة لبيت الدرج .. وروحي نامي باقي ساعتين على الفجر ..


سي يو ..

.

[abo-saly]

اللهم لك الحمد ..!

[الصباخ]

أنا جوالي فيه زئبق أحمر ومسيوم بعشرين ألف تشتري يابوإبراهيم؟؟

[مدحت شوقي بريده]

اقتباس المشاركة الأساسية كتبها الصباخ أنا جوالي فيه زئبق أحمر ومسيوم بعشرين ألف تشتري يابوإبراهيم؟؟

الصباخ ..

يابعدي انت .. اجل جواااالك فيه زئبق أحمر ..

طيب وش يدرينا إن جوالك بوه زئبق ..
بس يالبي الحل عندي ..

نجيب مكينة سنجر ونشغله عند الجوال ..
اذا اشتغلت المكينة يعني الجوال بوه زئبق ..


اقول دن هنااااك بس .. تحسبن جحة ابصدق إن الجوال بوه زئبق أحمر ..
ياعنبة اذا صار بوه زئبق أحمر يصيراستقبال بس ومايرسل ..


سي يو ..

[المميز نت]

اقتباس المشاركة الأساسية كتبها الصباخ أنا جوالي فيه زئبق أحمر ومسيوم بعشرين ألف تشتري يابوإبراهيم؟؟

هذا البلاء اللي جانا من المكاين


كلن بدا يكذب



لا تكذب يالصباخ اللي يبارك فيك ..




شكرا لك أخي مدحت

[قمردين]

ههههههههه
أضحك الله سنك يامدحت موضوع شيق وجميل ..

[مدحت شوقي بريده]

اقتباس المشاركة الأساسية كتبها قمردين ههههههههه أضحك الله سنك يامدحت موضوع شيق وجميل ..

قمردين ..

هلا والله بريحة رمضاااااااااااااااااااااان ..
يابعدي وينك انت ووين أيامك ..

ياخي مبطين عنك يالبي ..

بعدين لاتقول ( شيق ) احس إنه ( تركي ) يهوش ..


سي يو ..

[القصــ حزن ـيمي]

الصراحه الوضع صار يبي له وقفه جاده من الجميع زين اليوم قريت انهم راح يشددون الرقابه على هالمرض الجديد

[مدحت شوقي بريده]

اقتباس المشاركة الأساسية كتبها القصــ حزن ـيمي الصراحه الوضع صار يبي له وقفه جاده من الجميع زين اليوم قريت انهم راح يشددون الرقابه على هالمرض الجديد

حزن القصيمي ..
اعلمك بعد والله ياعليك إسم مهوب صاااحي ..
اجل حزك القصيمي .. اذا حزك مرة ثانية قصيمي والا حجازي ..
الزخه بطراق انثر سنونوه ..



اليوم انا قريت ان الشرطة ( تتبع ) الموضوع تبي تعرف مصدر هالشائعة ..
واعلمك إنهم لقوا هاللي مصدر الإشاعة .. ( اردني .. بالأردن )

شكلوه قاعدن يبيع زيتون .. ولا عنده زباين .. وخذ ياضرب من هالهواجيس ..
وشاف مكينة امه والا جدته .. ويبي يبيعه على واحدن دلخ ..
وقاله انه به زئبق وتباع بـــ10.000 .. والثاني صدق ..


وقال لا يازلمة .. شو الــ10.000 الآف هاي ..
انا والله هالسع ادخل عالسوق واشتريها بمية ..

ومن راعي هالزيتون جت الاشاعة عندنا ..
وحنا عااااد الله لايوريك .. نااااااااااس فااااااااااااااااااااااضية .. وتدور القلهي ..


ومشكور ياحزه القصيمي ..


سي يو ..

[نبوغ الفكر]

.

ههههههههههههههههه
ههههههههههههههههه
ههههههههههههههههه


تصدق أسمع بالسالفة ولا فهمته ,


وإلى اللحين مافهمته


الله يخلف عليهم ,,


مشكور أبو ابرهيم

.

[مدحت شوقي بريده]

اقتباس المشاركة الأساسية كتبها نبوغ الفكر . ههههههههههههههههه ههههههههههههههههه ههههههههههههههههه تصدق أسمع بالسالفة ولا فهمته , وإلى اللحين مافهمته الله يخلف عليهم ,, مشكور أبو ابرهيم .

نبوغ الفكر ..


هلابيك يالبي .. اجل ماتدري وش السالفة ..
هاللحين العالم هرجته هالمكينة .. أم أسد .. وام فرااااااااااشة ..
تصدق بعضهم ماعمره شاف هالمكينة ..

بس سمع الناس يهرجون به .. وقام يهرج معهم ..

وهذا حنا .. فاااااااااضين للمراكض ورى هالاشاعات ..


وكل واحد يقول هالنااااس مهبل ..
وهو اولهم .. من عقب الفجر نابزن عمره ورايحن للحراج ..
واذا رجع قال .. صحيح هالعالم مهبل ..
وانت وش انت ياعم .. يالله طايرتن شوشك بالحراج ..

اذا كل واحد قال هالعالم مجانيين .. ومنتقد هالوضع ..
اجل منهم هذولا اللي هناك حاضرين ..


مشكور يالبي ..


سي يو ..

[عنزي الاسياح]

ههههههههههههههههههههههههه
الله يسعدك دنيا واخرة على الموظوع الرائع والذي اخذ اكثر من حقه حتى في الاعلام
تسلم اناملك على الطرح الرائع

الف شكر
وتقبل طلتي

[مدحت شوقي بريده]

اقتباس المشاركة الأساسية كتبها عنزي الاسياح ههههههههههههههههههههههههه الله يسعدك دنيا واخرة على الموظوع الرائع والذي اخذ اكثر من حقه حتى في الاعلام تسلم اناملك على الطرح الرائع الف شكر وتقبل طلتي

عنزي الأسياح ..


هلا بك يالبي ويابعد معاليق بؤبؤ عيوني ..

اقتباس اناملك

بس حلوه ( أناملك ) تصدق يالبي مامعي علم إنك ( ملك ) ..
احسب معك سطحة يالبي .. واثرك ملك .. لاتخلينا يابو متعب ..

والله يانت جزوم بعد .. قل ظابط قل شي .. اجل ملك مرة وحدة ..

<<((== ياناس معين يفكر هالدبشة هالصعيدي .. شين اذا هجت بوه ..


عنزي الأسياح .. ودي امطخك الين تلثق خدودك من سعابيلي ..



سي يو ..

[رايسل]