[مرور]

السلام عليكم
أنا جديدة في هذا المنتدى لي شوي وأنا أدور بين المنتديات أدور أحد أسأله هذا السؤال.
فيه ناس عندهم طريقة غريبة شوي بالكلام
يعني مثلا يقولون فعل الأمر بدل الماضي زي مثلا
تقول اختي انه فلانة راحت للمكتب ويوم شافت النور مطفى واجدعي الشنطة وانكسي
بدال ما تقول جدعت الشنطة وانكست
وش رايكم سمعتو أحد يتكلم زي كذا
غريبة صح
والا تشوفون انه عادي
شكرا لأي أحد يتجاوب معي ما تتخيلون وشلون الموضوع مرررررررة مهم بالنسبة لي

[أبو سليمان الحامد]

سؤال جميل أختي مرور ,,

وهذه مسألة تعرف في اللغة بتحوّل دلالة الخطاب ,

فيتحول الخطاب مثلا من المتكلم إلى الغائب , ومن المخاطب إلى المتكلم

ويتحول المضارع إلى ماضي , والماضي إلى مضارع لأغراض يراد بها أثناء الكلام

وهذه كلها موجودة في اللغة العربية الفصحى , واستمرت حتى وصلت إلينا في لهجتنا في نجد , وتوسع الناس فيها

فمثلا : ( ونفخ في الصور ) الفعل ( نفخ ) فعل ماضٍ , ولكن هل حصل فعلا ؟

الجواب : كلا , ولكن جاء التعبير بالماضي للدلالة على أنه حاصل لا محالة فكأنه قد حصل وانتهى .

وقال تعالى : " ونقلبهم ذات اليمين وذات الشمال "

الحديث عن أهل الكهف , وهي قصة ماضية وقديمة , ومع ذلك جاء بالمضارع , ولم يأت بالمضي وهو : وقلبناهم , لأنه أراد تصوير القصة وكأنها واقعة الآن .


وفي لهجتنا نقول : راح محمد مع ولد خالته صالح للرياض , وجيت أنت يا صالح واصرخ ذيك الصرخة .... الخ

فقولنا : جيت أنت يا صالح تحول من الغائب إلى المخاطب

وقولنا : اصرخ , ومثلها اجدعي الشنطة

له وجهان :

إما أن يكون فعل أمر , وعبر به عن الماضي لأنه أراد تأكيد الفعل , فكأنه يأمره أن يفعله ..

وإما أن يكون فعلا ماضيا لكن بلهجة أهل سدير يزيدون ألفا قبل الماضي , , فيقولون : اطلّع , واجلَس , بمعنى : طلع وجلس , وقد سمعتها منهم مشافهة ...

فربما تكون هذه من هذه اللهجة وانتقلت بشكل محدود إلى لهجة القصيم .

هذا ما لدي والله أعلم .

[قـــصـــيـــة]

يازينتس والله ويازين موضوعتس

عادي أهم شي عرفتي الخبر هههه وهذا نوع من الشرح يعجبني كثير وأطبقه أحيانًا مع التمثيل لأنه يصوّر لك اللي حصل وكأنك شايفته بعينك
لدرجة بعد مدة تظنين انك حقيقة شايفته! تقولين أنا شايفته أو أحد قايلن لي خخخ

[معلم مغترب]

ملاحظتك جميلة وأعتقد وجدتي الجواب

[مرور]

شكرا أخي كبير المحايدين
الله يجزاك خير على شرحك وعلى المثال اللي حطيته

قصية يا زينك أنتي والله أسعدك الله ورزقك الجنة قولي آمين
ممتاز يعني أنتي تستخدمين هذي الطريقة

شكرا على مشاركتك أخي معلم مغترب

ممكن إذا ما عليكم أمر تعطونن أمثلة زيادة
وياحبذا ياحبذا لو كانت الجمل اللي تكتبون تكون يعني أشياء أنتم قلتوه فعلا

الله يجزاكم خير ويوسع عليكم
أختكم مرور

[قـــصـــيـــة]

اقتباس المشاركة الأساسية كتبها مرور قصية يا زينك أنتي والله أسعدك الله ورزقك الجنة قولي آمين ممتاز يعني أنتي تستخدمين هذي الطريقة ممكن إذا ما عليكم أمر تعطونن أمثلة زيادة وياحبذا ياحبذا لو كانت الجمل اللي تكتبون تكون يعني أشياء أنتم قلتوه فعلا الله يجزاكم خير ويوسع عليكم أختكم مرور

آمين يارب ومن قال
ياحبيبتي بدون أمثلة أي حدث تشوفينه احكيه للآخرين بصيغة الأمر وصلى الله وبارك

[ريدااوي]

سؤال جميل والجواب اجمل !

اشونى مادخلت قبل الكبير ( كبير )

كاننى مولف !!!

[بنت بلادن]

والله انك حقتي الموضوع بردك الثاني
انت تبين جواب لسؤالك وحصلتيه ليه ترجعين تطالبي بجمل وعبارات ؟؟؟
هذي كلمات تجي عفوية لها أسبشل خاص
ماهي سجل وكتب
مافي هدف من تجميع الهرج

[مرور]

أختي بنت لادن
حبيبتي فيه هدف من تجميع الهرج والهدف هو إني قاعدة أكتب رسالة
ماجستير عن هذا الموضوع بالذات وأحتاج أمثلة كثيره صارت فعلا في
الحياة اليومية فوق الخمسين مثال.
أنا آسفة لأني ما قلت الغرض ورا هذا السؤال بس لأني كلما قلت لأحد
رسالة ماجستير يصير ماودهم يتكلمون ويعطونن أمثلة من كلامهم اليومي
قلت أجي هنا وما أجيب طاري الماجستير يمكن إذا الناس حسبو انه مجرد سواليف
عامة يتكلمون

وشكرا لكل من تجاوب معي

[أبو سليمان الحامد]

^ ^

أتمنى يا أختي الكريمة أن توضحي مجال البحث والرسالة بالضبط

لكي نستطيع أن نفيدك , فهناك بحوث تهتم بلهجة أهل نجد والقصيم خاصة

فبحثك في أي ناحية منه : في التراكيب , في الإمالة , في الأفعال , في الإدغام ....

نرجو التوضيح أكثر .

والسلام ختام .

[معلم مغترب]

اقتباس المشاركة الأساسية كتبها بنت بلادن انت تبين جواب لسؤالك وحصلتيه ليه ترجعين تطالبي بجمل وعبارات ؟؟؟

العلم بحر ولا يمنع طلبه بأي وسيلة

تحياتي

[بنت بلادن]

اقتباس المشاركة الأساسية كتبها معلم مغترب العلم بحر ولا يمنع طلبه بأي وسيلة تحياتي

اي علم وأي بحر ؟؟
الهرج اللي مكتوب لا يدل على ماعللته الأخت !!!
اي تحايل للحصول على دراسة ؟ لن ينجح احد من هنا بدا ،
ليكن واضح من الطرح جاد في الطلب لا ينتظر طالبة ثانوية عامة ان تحرج بسؤال

وبعدين
اقول للاخت ان كان ماقلتيه صحيح ،،، !! فا أنا اقول بكل صراحة واسفي على التعليم ،، اعتقد أن مثل تلك الدراسة تجعل من الشهادة ورق سوق بل ورقة شوارع
على صاحبها والجهة اللي تبنت دراسته الرخيصة ان يبلها وينقعها ويصب مويتها في الشارع ،،،
ماجستير ؟ ودت شنطتها وحطت شنطتها ،، بس ودي ادري من هو ذا الفاضي لمناقشة ها الرسائل ' تنعاف الدراسات اللي هذا مستواها .

[الحياة أجمل مع الله]

اقتباس المشاركة الأساسية كتبها بنت بلادن اي علم وأي بحر ؟؟ الهرج اللي مكتوب لا يدل على ماعللته الأخت !!! اي تحايل للحصول على دراسة ؟ لن ينجح احد من هنا بدا ، ليكن واضح من الطرح جاد في الطلب لا ينتظر طالبة ثانوية عامة ان تحرج بسؤال وبعدين اقول للاخت ان كان ماقلتيه صحيح ،،، !! فا أنا اقول بكل صراحة واسفي على التعليم ،، اعتقد أن مثل تلك الدراسة تجعل من الشهادة ورق سوق بل ورقة شوارع على صاحبها والجهة اللي تبنت دراسته الرخيصة ان يبلها وينقعها ويصب مويتها في الشارع ،،، ماجستير ؟ ودت شنطتها وحطت شنطتها ،، بس ودي ادري من هو ذا الفاضي لمناقشة ها الرسائل ' تنعاف الدراسات اللي هذا مستواها .

وش هالتحطيم ياأختي قسسم بالله هديتي حيلي وأنا مالي دخل ياخي ماعندك رد على موضوعه لاتردين مب لازمم ترى
بعدين هي حاطه الموضوع تبي المساعده يعنني ((حب لأخيك ماتحب لنفسك))
اما خرابيطك هاذي يبلله ومايبلله بككيفه هو حر بنفسه يكمل مايكمل ماتبين انتي لاتكملين

مرور أختي الله يوفقك بحياتك الدينيه والعمليه وجميع المسلمين يارب

[مرور]

اقتباس المشاركة الأساسية كتبها الحياة أجمل مع الله مرور أختي الله يوفقك بحياتك الدينيه والعمليه وجميع المسلمين يارب

شكرا، أنا ما بغيت أرد عليه عشان الموضوع ما يصير هوشات
بالنسبة لموضوع رسالتي اعتمادي على الله مهب على ناس من شاكلته أنا رحت منتديات ثانية
وإن شاء الله ألقى اللي أبي
شكرا مرة ثانية وعلى فكرة اسمك مرة حلو