[Bleeder]

شلام عليكم







أول شي أبشركم إني عطلت ، ترانا نسعد ونستقبل اقتراحتكم وأرائكم عن عطلتي العزيزة
الموهيم ، كانت أكبر بزعه في التاريخ هي دخولي قسم السنه التحضيريه وأنا من جنبه ، يعني داج هاج بالانقلش وكيذا يعني ،، الشاهد إنه حصلت لي سوالف بالقسم ذا لمين قلت العيد الليله
ولعلي أبسردهن لكم بهالموضوع ، وكل ماتذكرت سالفه أبنزله فيذا ..

[ 1 ]

أول يوم من التحضيريه كان هم وغثا ووع وكل شين شي ،، جابونا الساعه 11 الظهر ودرجه الحرارة الظاهر إنه طاقه 40 ومكيف البتبت مايقوى هالحر
دخلونا بقاعات كبار به 70 نفس ، وكان به دكتور مصري وباكستاني ، كل واحد يقول للثاني أنا أشين منك هالمصري فرح إنه يعرف يهرج انقليزي والهرجه زس دس إن زا دنستي ، وإذا بلش بكلمه نطقة بالعربي والباكستاني الثاني من تشوف وجهه اتوحش ، شنب كبر وجهي ثلاث مرات ووجهن عابس يروووع بالحيل
طبعا الهرجه كله انقلش بانقلش واخوكم يدربي دميجته بين هالخلق ، عطونا ورقة أسأله وورقه إجابه نفس طريقة اختبار القياس
طبعا ورقة الأسئله به 50 سؤال ، وماسكتن معي تفنن بالإجابات والقرايه ، والصدز إن قرايتي تهجئ ولا أفهم وش المطلوب ، الموهيم إني مليييت من التلوين والخربطه لمين شفت الطلاب يطلعون وأنا توي ماقضيت من السؤال 20 =( ، خربته وبديت ألون على النيه ، ولعلي تعديت التلوين إلى سؤال 100 ، يعني قفلت كل ورقة الأجوبه ، يوم سلمته الدكتور ، قعد يناظرن ويضحك علي ويهرج انقلش ، توقعت من نظرات وجهه يقولي ماشاء الله وش هالجيد ذا
عطان مساحه وقال امسح لمين سؤال خمسين ولا أشوفك مرتن ثانيه
طلعت وأنا مدنق راسي من الفشيله والعااار والايه ،
ثاني يوم صار هالباكستاني هو دكتورنا بالريميديال ، ياويل حالي وش الدبرة معه
أذكر هاك المرة أبسأله سؤال وقعد أجمع لي كم كلمه على بعض ونسفت أبو الأزمنه وترتيب الجمل
المهم إني بديت بأول كلمه ثمن دقرت بالثانيه وقعدت أفكر به شوي ، وقال لي وش تبي أنت ؟؟
قلت له سلامك مانبي شي ..
تحصل أحيانا بعض الكلمات الهاجه ، مثل مرة من المرات كنت أبقوله ، أقدر أروح لدورة المياة، ولعلي قلبت الضمير وقلت له تقدر تروح لدورة المياة
عاد هم يسلكون لنا ، يدرون إن الطلاب ماحولك أحد ..


تعبت من الكتابه ، والكيبورد يوحم التسبد ، أغدين أكمل لكم فيما بعديين


سيي يوووو