[بريداوي وكلي فـخر]

بسم الله الرحمن الرحيم

اللهم لك الحمد حتى ترضى ولك الحمد إذا رضيت ولك الحمد بعد الرضا

اللهم صل على محمد وعلى آل محمد ..

اليوم أبترك اللغة العربية و الرسميات على جنب ... وأبكلمكم و أسولف معكم بكل بساطة ..

أولاً ::

يا الله إنك تحيي الرجال كل أبوهم ... يا هلا ومسهلا .. أسفرت وأنورت ....مدخل الحريم مع الباب الثاني يا أختي .... (صب القهوة يا ولد للرجاجيل)

ومبروك عليكم الإجازة .. و النجاح .. ويارب مزيد من التفوق و التقدم الديني و الدنيوي
والي ما حالفهم الحظ .. لا تضيق صدورهم .. ترا الواحد ما يعرف وين الخيرة فيه .. والقادم أحلى بإذن المولى.

ثانياً ::

أنا صراحة فيه موضوع أو نصيحة ودي أكلمكم فيه .. و أبغاكم تتقبلون الموضوع مني كأخ أو صديق

وودي أشوف ردودكم .. يعني أي واحد عنده رأي .. أعتراض ... عنده شيء يحب يضيفه .. أررررررحبو


ثالثاً الزبدة)

والله يا أخوان من بدأت الإجازة وأنا أشوف الشباب ما غير تبطح .. و تسدح .. بهالبيت .. أو الإستراحات .. ومقابل بلاي ستيشن أو التلفزيون .. ونوم بالنهار .. وسعستزة بالليول .. وعلى هالحال .. و لا شغل ولا مشغلة.

يا شباب قسم بالله يا اللي تسونه ما يصلح .. ولا يرضي .. الا العدو.

يعني الاجازة تجيكم نعمة من الله . . . وكسر للروتين و الدراسة .. تروحون تحطون أنفسكم بروتين و اسلوب حياة ممل ومضروب ..

يا أخوان استفيدوا من الإجازة بأي شيء ..

بالنسبة للشباب الصغيرين يعني 10 --16 .. ترا الإجازة فرصة والله ما تتعوض إن الواحد يكتشف موهبته .. وميوله وين و يحب إيش .. يعني جرب نفسك فكذا موضع .. جرب نفسك بالقراءة .. بالكمبيوترات والإلكترونيات ... جرب نفسك بالرسم .. بالأدب .. بأكبر قدر تستطيع من التجارب .. ولا تحقر روحك أبد

وترا كل واحد في هالدنيا له شيء يميل له ويحبه ... وممكن بيدع فيه ..
ولا تقول أنا ما أنا ...أنت أحسن واحد

المشكلة إذا تعديت هالمرحلة العمرية هذي و أنت ما غير تدربي رويسك مع هالعالم ... وين ما يروحون معهم .... تقل قلص مربوط بجيب ... ما يصلح هالعلم الله يصلح قلوبكم

يا لبى خششكم والله

أما الشباب الشنبات ... 18 و فوق ... عاد هذولا على ما قال .. هم سواعد المجتمع
أنتم ياشباب في مرحلة الحين يكون الواحد فيها في ( طور التطوير وصقل المواهب) يعني الواحد الحين المفروض يكون عارف يحب إيش .. يميل لإيش .. يكره إيش .. يعني الإجازة تراها فرصة والله لكم و (لي) إن الواحد يطور من نفسه وموهبته وشخصيته .. فيه وقت كافي يارب لك الحمد .. و والله حرام وقهر .. وتشتب كبدي إذا شفت واحد من الشباب كل همه جنط يلمع أو شكمان يتبالص .
ما يصير يا رجال ..
وبالنسبة للي معهم سيارات .. ومن الله عليهم بالوقت ..
لا تبخلون على أهلكم بالخدمة .. خصوصاً الإميمة و خواتكم ترا والله لهن حق ..
يعني إذا ما تمشينا بأهلنا .. ورحنا بهم .. وجبنا لهم الي يبون .. من يبي يونسهم ويفرحهم .. ولا تقول أبوي أو أخوي .. خلك أنت دايم الأول للخير .. ولا تنتظر أحد .. ولا تنسى إن ما فيه شي يضيع
و إن حصل لكم تسافرون بهم .. وما له .. إنقر السيارة سلف .. وتوكل على الله

وبالنسبة للشباب الي يقولون : أنت ما تعرف أهلي أصلاً ... أو بلاك ما تدري عن خواتي أو عيالي مش زي عيال الناس ..
ترا عادي كل الناس إذا راحوا صجة ولجة بالسيارة والبزران يتهاوشون .. وأنت أفحز .. ويكبوبكون بالمطاعم ... يعني (خلك كذا على طول)

اسعاد المسلم و إدخال السرور على قلبه ... من أفضل الأشياء .. فما بالك إذا كنت مسعد أمك و خواتك. . أو زوجتك وعيالك

و أما الشلة والأصحاب ... لا تخافون ما هم طايرين .. ممدي إن شاء الله .... وكل شيء يمشي بالأولويات .


بارك الله فيكم ونفع بكم ...

كلمات والله كان ودي أوصلها لأكبر عدد ممكن ,, فقلت خل أكتب بالعامية .. لأني أعرف إن بعض الشباب إذا شاف (حيث أن .. ومما لا يجدر بكم ... ) ضغط رجوع .. وهج

فيه أشياء كثيرة والله ودي أقولها ... لكن لعله في الردود .. ما أحب صراحة يكون الموضوع كأنه صك من المحكمة من طولة .

.. في حفظ الله