[بريداوي وكلي فـخر]

اقتباس المشاركة الأساسية كتبها عربي أصيل فرصه راح أذكر لكم قصتي مع الإختراعات يوم كان عمري 17 سنه وكنت في الإجازة عاد ذبحن الفراغ قمت وفكرت أسوي فقاسة بيض ( يعني فقاسة بصابيص دجاج = صوص ولا بط ) أيه والله يسلمك يوم فسرت عن ساعدي وبديت أشتغل أولاً بديت بنشر الخشب ( عاد الوالد الله يحفظه يمر من عندي ويقول الله يصلحك ما راح ينجح شغلك ما غير توذي نفسك قلت وش لي إذا نجحت يبه قال لك ( وأثري ذيك الأيام مخطط على سيارة ودي أبيع سيارتي وأخلي أبوي يكمل أفلوسها واشتري سيارة أزين وفي وقتها أحاول فيه ورافض <<< عاد هو قال في وقت صنعاتي ذي الفقاسة راح أكملك أفلوسك وتشتري السيارة ألي تبيه .. قلت كويس وزاد إصراري حتى خلصتها الحمد لله مع العلم أن كل محتوياته توليف .. المهم رحت وجبت بيض وحطيتها في الفقاسه .. وبوي يمر كالعادة ويقول والله انك مسيكين ما غير ذابح نفسك شغلك هذا ما غير ضياع وقت ( عاد تعرفون الشيبان الأولين الله يحفظهم ما يعرفون التشجيع ورفع المعنويات ) .. قلت هين يا بيي إن شاء الله راح تشوف .. حطيت البيض وبعد تقريباً 21 يوم فقس البيض وطلعت البصابيص ( الصوص ) عاد أنا أنواع الفرحة ( بغيت أسوي حفله ) .. وأركض أبشر أبوي قال إيه ما راح يعيشن راح يموتن إذا عاشن لك ألي تبي : قلت ميخالف وأعتني فيهن حتى كبرن أشوي قلت لبوي هاه وش رآيك قال توك خلهن يغدن أكبر ما أعتقد راح يصمدن ويعيشن .. حتى أنهن كبرن وصارن أمهات ولهن أطفال خخخخخخخخ أقصد صيصان والصيصان صارن أمهات وجابن صيصان وهكذا يمكن ذريتهم للحين موجودة في المزرعة الحين .. بعدها صارت ذكريات حلوه عاد أنا كل ما جتني فرصه ذكر اختراعات أتميلح وأذكرها خخخخخخخ وعقبال ما أخترع ذره إن شاء الله .. وسلامتكم .. وشكراً بريداوي وكلي فخر .

أهلاً وسهلاً .... صبوا القهوة للعربي الأصيل ,,, قهووا الرياجيل

ما شاء الله تبارك الرحمن ... أهنيك صراحة وأشد على يدك .. نعم هكذا يجب أن تكون الإرادة القوية و الإصرار .

بس ما قلت هالمشروع الهدف منه إنتاج أو تجارة
ما شاء الله أجل عندك هالحين حمولة طيبة من هالبصابيص .. كان عزمت الوالد .. على كم دجاجة .. وقلة شف يا أبيي .. تحسب لعب

بارك الله فيك