[الأمل بالله]

السلام عليكم

أعضاء وعضوات بريدة سيتي

أملي بالله ثم بكم كبير لايجاد حل للي باطرحه هنا


تعرفت على وحدة من الأخوات بحكم الجيرة منذ فترة أقدر أقول عنه ( طويلة ) وأصبحنا صديقااات وعرفت تقريبا عنها كل شيء

وهي الآن في حالة من التشتت لا يعلم بها سوى الله

عَرَضَتْ مشكلتها على مواقع فتاوى مع انه ما تحتاج فتوى

وكلمت شيخين او ثلاثة لكن للأسف ردوا عليها بهواش واتهموها بأنه خرجت عن الملة ..!


وتعقدت أكثر ...
البنت حالتها النفسية سيئة حرام يقولون لها كذا : (

فقلت لها انتي ما تحتاجي شيخ انتي تحتاجي اخصائي نفسي أو ليقظة ضمير

وتضايقت زووود وبلشت به

فقلت له عن المنتدى وان شاء الله قريب بتسجل به

وكيف ان ردود بعض الاخوان والأخوات هنا فيها حلول لبعض المشكلات اللي تطرح
بحكم طبيعتنا البشرية الواحدة

بقولكم مشكلتها - بعد ما استأذنتها طبعا - وان شاء الله تلاقون معي حل لها

أختي هذي ( كانت ) حريصة ع الصلاة بشكل ما تتخيلونه

الصلوات بأوقاتها

وتؤدي النوافل بعد بعض الصلوات

وكنت أشوفها بزياراتي لها أو العكس تختم كل صلاة بدعاء وتبتسم لما تخلص من صلاتها

تشوف الراحة فـ وجهها سبحان الله

( كانت ) حريصة ع أذكار الصباح والمساء

ع سنة الشفع والوتر

( كانت ) تصوم فـ بعض الأحيان الخميس كتطوع

كانت تعيش فـ سلام داخلي مع نفسها رغم كل مشاكلها المعقدة

لكن من تزوجت وحاله انقلب

صارت تأخر الصلوات وتجمعهن

ثم شوي شوي بدت تتركهن وتصليهن من اليوم الثاني

همن الحين تقولي : ( تصدقين في صلوات أسبوع كامل مادري شلون أقضيهن ؟؟!! )


وأكيد من باب أولى تركت النوافل والسنن والأذكار

مو عشانه عاشت حياة سعيدة مع زوجها والتهت عن العبادة ... لأ



هي استانست كام يوم معاه وبعدين ابتدت المشاكل تجيها حتى فـ حياته الزوجية

وكأن جاتها حالة اكتئاب وقنوط

هي كانت هاربة من مشاكلها بـ هالزواج وانصدمت لما ابتليت بـ هالزوج

تقولي ليش حياتي كذا

ليش ربي كتب لي الشقا وأنا انسانه ملتزمة

صارت وحدة ثانية

قبل كانت تخاف اذا سمعت الاقامة وانه للحين ما صلت

والحين عادي عنده ... تقول عجزت لأحس بالخشية

ودي اذا سمعت كلمة الله اخاف


ودي اذا صليت أخشع

طبعا هي ما تترك كذا عمدا ... مثلا تنام وتحس بثقل لما تصحى للصلاة أو حتى لأي غرض ثاني

تنام بشكل مو طبيعي حتى زوجه قاله هـ الشيء

غير النوم .. لما تصير فـ عذره الشرعي اذا اغتسلت تلاقي صعوبة ترجع للصلاة مع انه قبل زواجها كانت تتشوق للصلاة والمصحف خلال هـ الأيام


الله يخليكم أبي له حل .. عجزت عنه بلحالي


أنتظركم والله يجزاكم خير مقدماً



وتكفووووون ياللي بتدخلون تهاوشون أو تكفرون .. لا تردوووون ترى حنا مو ناقصين ...


.