[الصباخ]

زواج .. أم محاضرة .. [فائدة .. أم سخافة] .. ظاهرة النصيحة في الزواجات ..














الموضوع واضح من عنوانه .


قبل عدة أيام حضرت زواج لأحد الإخوة بارك الله فيه ووفقه ، أول مادخلت الزواج ، إلا وأشوف واحد من بعيد ينصح ، وعلى طول أخوكم في الله ، مايمسك لسانه ، إلا وقلت:
الحين حنا داخلين عرس .. وإلا محاضرة !!

ويرد علي واحدن جمبي توه داخل ، ولا أعرفه:
إتق الله يارجل ، ولا يجوز تقول مثل هالكلام ، خاف ربك .

أنا بصراحة ماتوقعت هالرد من هالشخص ، لأنه أولاً ما أعرفه ، ثانياً ماقلت شيء حرام ، وأخوكم في الله من النوع اللي مايعرف يسكت ، إلا وأرد الصاع صاعين:
الحين اللي قلته حرام أنا !! بعدين أنا ماقلت شيء غلط ، كل اللي قلته حنا داخلين محاضرة وإلا عرس !!

ويرد علي برد أغرب من الرد الأول:
الله يصلحك بس .

أنا تبسمت في وجهه ، وجلست أضحك في نفسي ، وقلت في نفسي:
يارجال ماعليك من هالرجال ، أنت جاين العرس علشان تستانس .

المهم وندخل على ماقال ونقعد شوي ، إلا ويبدأ اللي قبل شوي كان ينصح ، وينصح مرة ثانية ويقعد هالناصح حوالي ربع ساعة وهو ينصح ، ويوم انتهى دخلنا على العشاء .


يعني شفتوا نصح مرتين قبل مايجي الجنب وبعد ماجاء الجنب .

يبي كل الناس تسمع كلامه .


الصراحة يا إخوان أنا لست ضد النصيحة ، ولكن لكل مقام مقال حنا داخلين عرس علشان نشوف ناس من زمان ماشفناهم ونسولف معهم ونضحك ونتقهوى وعلى ماقال نسفهل ، موب داخلين محاضرة .


أمر آخر:
لي قريب أطال الله عمره وهو من مشائخ مدينة بريدة ، يقول في جلسة خاصة معنا:
مرة من المرات كنت في زواج وجاء إلي أحد الأخوة وطلب مني أن ألقي نصحية ، فأجبته بالرفض وأن لكل مقام مقال ، وأن الناس جاءت لهذا الزواج لرؤية بعضهم البعض ، وليس للنصيحة أو المحاضرة .





أخيراً ، أتمنى إنه محد يفهم كلامي غلط [يارجال يبي يجي واحد فاهمك غلط ] ويفهم إني أكره المحاضرات أو النصائح ، لكن المقصد أنه لكل مقامٍ مقال .











ترى بالعادة أقعد وأنا أكتب المقال فترة من الوقت وأحفظه بالوورد ، وأعيده مرة ثانية وأعدل فيه ، بمعنى أوضح يجلس الموضوع له أسبوع وأنت جاي ، لكن هالمرة كتبته على طول لأنه مالي خلق أقعد أسبوع وانا أعدل .







شكراً للجميع .





ودمتم سالمين ،،