[مدحت شوقي بريده]

السلااااااااااااام عليكم ..

اول شي اهنئ اهل الريااااااااض .. بالاجااااااازة هاليومين ..
والصراااااااحة المفروض يغيرون اسمه ..
من مدينة الرياض الى مدينة الاجازاااااااااااااات ..




بس هالمرة طلعت بطاعونة هالإجازة .. يوم يقولون فيه اجازة وبعدين يقولون مابش ..
وحنا بلشين بشنطة امي .. ماغير ننزله ونرفعه فوق هالدولاب ..
فيه اجازة نزلوا الشنطة أحط به هدومكم .. نروح للشرقية ..
لا مافيه اجازة ارفعوا الشنطة فوق الدولاب ..
والله يالسحاب من القهر لاشاف امي وهو فوق الدولاب انفتح هو من نفسه ..


مالكم بالطويلة يالبي ..


انا طلعت انا وجدتي موضي بشوارع الرياض نشوف استعدادات الرياض لاستقبال الوفود ..
ومثلكم خااااااابرين .. مع كل مؤتمر .. تستعد الرياض لاستقبال هالضيوف ..
بالورود والأعلااااااااااااااام .. والاجازات ..



وحنا ندور بالشوارع ومعي ( صقيقتي ) جدتي موضي ..
طبعاً مغطية نص وجهه والنص الثاني مطلعة عينه علشان تشوف .. ونص العباة تسحب بالشارع ..
وتطن معه وتحشرهة جدتي وتسألن :



هاللحين ياوليدي وشواله غازين هالبيارق ..
وشواله هالعالم هاللي تخترش ماغير تغرس بهالورد .. غاديتن الأرصفة يادافع البلى تقول مزهرية ..


هذا يمه علشان اجتماع راعين منظمة اوبك ..
جامعينهم يبون ( ترفع ابوك ) اسعار البترول ..

ارفع ثوبي .. وش عليهم من ثوبي ارفعه فرقعين جدي ..
<<((== تحس انه مطمبسة وماسكة طرف ثوبه من تحت ..


لا لا ياميمتي وش دخلهم بثوبتس .. عااااااد لاتخلينا انتي وهالثوب يافستان زفاف فاتن حمامة على غفلة ..
هذي ياميمتي ( اوبك ) منظمة الدول المصدرة للبترول ..


ايه .. البترول .. زاد اقول ياوليدي وش ريحة هالديزل ..


ياميمتي وش يجيب الريحة لهم .. والله لو انهم يشتغلون بمحطة بنزين ..
هذولا وزراء .. مثل النعيمي عندنا هو اللي يجمع قروش البيع حقات البترول ويروح يعطيهن الملك ..
يقول للملك .. هذولي قيمة بيع 9.000.000 ملاااااااااااايين برميل ..


لااله الا الله .. تسعة ملااااااااااااااااين برميل كل يوم ..
وتسبدية ياوليدي من هاللي يبي يدربيهن لهم .. هذولي يبي لهم شهر وهم يدربونهن ..



بعدين وش يبي بهم الملك يجمعهم عنده .. يجيهم شي همن يقعد يبلش مع اهلهم فرقعين جدي ..
هذولا بسم الله علينا سريعين الاشتعال .. مير علم الملك لايقعد هاللحين يدخل عليهم بالمبخرة يبي يبخرهم همن يقبعون ..


ياوليدي هذولا الله اعلم انهم يتطيبون بطفاية حريق ..

انت تدري ياوليدي ان هذولا يعرقون ديزل .. مهوب مثلنا عرقنا موية وملح ..



اقول ياوليدي انا اقول الله يستر من هالاجتماااااااااااااااع ..
اخااااااف بااااااااااااتسر عقب هااااااااااالاجتماع ..
يرجع سعر لتر البنزين الى ريال ..

همن نقول ياليتنا بلى هالااجتماااااااااع وبلى هالاجااااااازة ..
لأنهم هذولا هم ماااااااايتحركون الا ويخلفون لنا مصيبة ورى تحركهم ..



وسلاااام ائليكم ..

[..-* هـارديز *-..]

هههههههههههههه حلوة يامدحتوو مير خوفتنا الله يستر صدز بيرتفع البنزين وااااااااااوك مامدانا ..

[مدحت شوقي بريده]

اقتباس المشاركة الأساسية كتبها ..-* هـارديز *-.. هههههههههههههه حلوة يامدحتوو مير خوفتنا الله يستر صدز بيرتفع البنزين وااااااااااوك مامدانا ..

هلا بالبي هارديز ..
اقول يالبي وش يقربلك هاردسك ..
اعلمك بعد .. هارديز شكلة عيارة واحدن امريكي ..


يالبي الخوف ان هالاجتماع يتمخض بخفض اسعار البترول الخام ..
وزيادة اسعار مشتقاته وهذ اللي يحصل دايم .. همن شلق يالبي ..


وشوكرن لك يالبي ..


سي يو ..

[دعبل نجد]

صدقت يا مدحت
وسلملي على جدتك موضي . . .

[مدحت شوقي بريده]

اقتباس المشاركة الأساسية كتبها دعبل نجد صدقت يا مدحت وسلملي على جدتك موضي . . .

هلا بالبي دعبل نجد ..
مشكور يالبي على المرور ..

بعدين يالبي ترى جدتي بلشة .. مانقدر نقوله ان احد يسلم عليتس ..
اذا قلنا له تدوخ علينا .. لإن به فقر دم ..
لأنه تستحي وتغدي شدوقة حمر
.. همن يقضي الدم اللي به وتدوخ ..
مابه الا شوي هالدم وراح لخدوده ..

نبداء نعصر بخدوده ونعصر الين ترجع نقطتين هالدم للمخ همن تصحي ..

ومشكور يالبي ..

سي يو ..

[..-* هـارديز *-..]

على الطاري وش رايك نطلع إشاعة إن البنزين بيرتفع علشان يرخصن السيارات

[جيدا]

والله ان الجده حكيمه وعنده بُعد نظر ..

ياحبيلك يامدحت انت وسواليفك ..

كم اتشوق واستمتع بالقراءه ..

بس ولو تراي حقد .. ماعندنا إجازه ..

[مدحت شوقي بريده]

اقتباس المشاركة الأساسية كتبها جيدا والله ان الجده حكيمه وعنده بُعد نظر .. ياحبيلك يامدحت انت وسواليفك .. كم اتشوق واستمتع بالقراءه .. بس ولو تراي حقد .. ماعندنا إجازه ..

جيدا ..

ياحبيلك يابعد معاليق صلعة بسيوني ..


يالبي جدتي اسمه موضي .. مهوب اسمه حكيمة ..
وبعدين من قالك ان عنده بعد نظر ..
ياويلي من ضعف النظر .. القطرة تشربه شرب .. مهيب تحطه بعيونه وبس ..

ياحبيلك يالبي وشكراً على مرورك الكريم ..

سي يو ..

[تغاريد نجد]

الله يحلل جدتك موضي منك
الله يجزاك خير أدخلت السرور علينا

[مدحت شوقي بريده]

اقتباس المشاركة الأساسية كتبها تغاريد نجد الله يحلل جدتك موضي منك الله يجزاك خير أدخلت السرور علينا

تغاريد نجد ..

انا جدتي موضي محللتن .. قايلتن لي .. رح تراااااك بحل ..
انت دبشة ياوليدي ماعليك شرههة .. الله يخلف على بنيتي الله كل ماقامت والا قعدت قالت عندي مدحت .. صحيح انه تفخ ودبشة بس مايخالف والله انه ينفع بعض النوبات ..


وشكراً لكي على مرورك الكريم ..


بس ابسأل ..
( أدخلت السرور )
وش يقرب .. لخوي السرور ..


سلاااام ائليكم ..

سي يو ..

[دلووووووني]

على طاري الاجازة !!!

تصدق اني تذكرت الرمضان الله يشرفه !!

صارت هرجة الناس ما غير يقولون : اعلنوا ؟ ما اعلنوا ؟؟؟

تقل يتحرون رؤية الهلال !!

يحول يا انا لي زحمة الرياض ومالي اجازة

[طويل العمر]

ياخي مواضيعك كلها تنسيم انت وجدتك موضي

[مدحت شوقي بريده]

اقتباس المشاركة الأساسية كتبها دلووووووني على طاري الاجازة !!! تصدق اني تذكرت الرمضان الله يشرفه !! صارت هرجة الناس ما غير يقولون : اعلنوا ؟ ما اعلنوا ؟؟؟ تقل يتحرون رؤية الهلال !! يحول يا انا لي زحمة الرياض ومالي اجازة

هلا بالبي دودلوني ..

يابعدي انت ماتدري وراهم يقولون فيه او مافية ..

لإنهم عازمين حق فنزويلا .. ويقول ان مايقدر يجي .. لأن عليه الدورية حقت خواله ..
ان قدرت افهقة للسبت اللي بعده فاأنا جيت ..

تعرف يالبي هم ماهوب مسلمين مثلنا اجازاتهم السبت والأحد ..
ويحطون دورياتهم بإجازاتهم ..

عاد يقولون ان امه شاورت خوالك ياشافيز يارئيس فنزويلا .. ووافقوا يفهقونه ..
بس قالو بشرط يجيب معه كليجا وسكري .. ويعشينا مثلوثة ..

وسلاام ائليكم ..

سي يو ..

[الصباخ]

اقتباس هذولي قيمة بيع 9.000.000 ملاااااااااااايين برميل ..

وسعر البرميل لا يقل عن 80 دولار .


وعليكم الحساب.



والأسعار مرتفعة، والدنيا نار نار، والشعب مغلوب على أمره.

الله يخلف علينا بس.


شكراً مدحت.