[SH2M5]

حياك الله وياهلا ومسهلا , البيت بيتك اقلط , العشاء علينا أو تدري عليك


أنا ميزتي صريح و أجيب الشيء على بلاطة , أو على سراميك أهم شيء انا صريح .. (( بس هالمرة أبجيب سالفة من خيالي )) ..


أذن الفجر .. تسمع الصراخ من بعيد جاي

قـــــم قــــم للصلاة , الله يبحط إبليسك .. وسيل من هالدعوات اللي ما أدري منين يطلعن

أفتح عيوني ..
أتثاوب ..
أتمغط ..

كل هالأمور وهي تحترين أقوم قدامه .. (( أولاه روحي خلاص قسم بالله قمت )) ..

أنت ما تدري إن الجنة تحت رجليننا ؟!
أنت ما حفظت الحديث اللي الرسول - اللهم صلي عليه - جاب طارينا ثلاث مرات وجاب طاري أبوك مرة وحدة ؟!

تتحول - حفظها الله - إلى داعية دينية .. يعني أحسن شيء محاضرة على الريييق ... وقسم ولا بيبسي حار ..

أهم شيء أروح أشغل المغسلة , وأتمغط .. لمييييين ( أنز ) ..

سبب النزة : نعلة تمشي 5 آلاف ناحرتن وجهي .. أتوضى وأروح أصلي .. أرجع من الصلاة ألقاه بسجادته الله يعدّي عنه .. أنطلق للسرير خبركم الغرفة باردة هماي مشغل المكيف .. أدخل ألقااه حر ..

طق طق طو طي وش السالفة .. ( الوالدة طفت المكيف , تقول بررد ومنب شاقيتن بكم إلا أنا ) .. طيب يممه قسسم حر .. ورب الكعبة حر .. ترد بلسانها ( الحر ما عمره جاب مرض البرد هو اللي يجيب الأمراض ) ..

أحتريها تروح , ثم أشغل المكيف وأنا .. ( طبعاً ترجع تتأكد لكن ترحمني ) ..

نفس المنوال ذا صلاة الظهر .. ونفسه نفسه بصلاة العصر .. بعد الصلاة ( تنحدر علي الطلبات والتودات للسوق وقبة رشيد ) .. ما فيش مشاكل راح أوديكم .. يركبون وهم يضحكون وأنا جالس أحك الضربات والكمخات .. ثم أشغل المسسجل يلعلع حدا هالمنشدين ..

باختصار :

بكرة ..

أمي : ودنا للسوق ياوليدي اليوم ..
أنا : مرتبط اليوم والله .. موديكم أمس
أمي : اييه أنت ما عمرك نفعتنا .. الله يصلحك بس
أنا : وقسم بالله موديكم أمس ..


هالحين عرفتوا ليش ما ودي يطبن النساء هنا .. أخاف يعلمن أمي .. تكفون إذا جت قولوا لها إني جالس أذاكر

لكن قربوا شوي .. قربوا قربوا .. ( ما تلاحظون الحريم غالباً ينسن كل اللي أنت مسوي ) ..

من جد الأمهات لهن فضل .. لا تنسووه

تحياتي : شامخ