[فؤادعنتر]

((الدنيا تبي ولآخرة تبي))

اشكر الجميع والقادم احلا .........................................

ونكبر الخط عشان الدبية ما تشوف ؟؟؟؟؟؟؟؟ كم عمرك

[الدبيهــ]

مآآل أبوه دآعي السؤال

[فؤادعنتر]

التقدم بالسن يسبب تراجع بالنظر مفهووووووووووووووووووووووووووووووم دبدوب

[سليق المشرح]

عنترة بن شداد اسمح لي وضعت موضوعك مكبر قليلا حتى اقراه لو شوي



لا يخفى على الجميع المستوى الحلزوني الذي بلغْتٌه من القدرة على تحليل الأمور وسرعة البديهة ودقة المعلومة وإصابة الرأي السليم ما لكم بالطواااااالة .
كعادة الزملاء يستشيرونني بما يلم بهم من مصائب ومشاكل ، وآخر من استشارني أحد الزملاء عن علاقته بأهل زوجته أنهم ناس ما يقدرونه ولا يحترمونه وانه أذا جاء لمناسبة ما يسلمون عليه بحرارة مثل أزواج البنات الثانيات مع كونه يخدمهم وهو اللي يجيب طلباتهم ويوديهم لزوجات ولاستراحات وكل البنات يركبن معه بالسيارة بعد انتهاء الزواج أو طلعت الاستراحات ووزعهن على بيوت أزواجهن وأزواجهن جالسين بالاستراحات مع الشباب وأبو زوجته إذا سلم عليه ما يسلم زى الناس يعطيه جبهته تقل سلام معزا ((معزا مفردها عنز )) واخذ يسرد كل المشاكل اللي يواجها مع أهل زوجته وإخوانها وأزواج البنات ويقسم انه كفل ثلاثة من إخوان زوجته بسيارات ولا سددوا ويوم طالبهم زعلوا ولا يكلمونه الحين !!!!
وان أم زوجته عليها حركات بايخه مثل أنها ما تحضر زواج خواته وتتعلث ( تتحجج ) أنها مريضة و أذا جاء زواج خوات عديله نطت أول وحدة بالجمس ما بقا إلا تسوق ؟؟؟؟ و إذا قال : روحي معنا لمكة ترفض وتروح مع العديل الثاني وإذا جابت حقاق (هدايا للأطفال من فيشار وخلافه) ما توزع لما يجون أولاد عديله وإذا ما جو قالت : بعدين نوزع وإذا تأخر هو حصل الحقاق موزع ( اعناد ) يقول : حتى الشغالة يأخذونا بالشهر والشهرين ولا يقولون جزك الله خير ؟؟ ولا يراجع بالمستشفيات لم زوجته وأبوها إلا هو ويحلف انه كد رافق مع أبو زوجته بالمستشفى شهرين يوم صار عليه حادث وبالأخير يقوله أنت طمع بإجازة المرافقة عشان ما تدوم ؟؟؟ المهم جلس يتكلم حوالي ثلاث ساعات لما أنا قلت له ((صه)) يعني اسكت خليني ادرس الموضوع وعلمك بالنتائج والحلول تعرفون الشيء ذمه وما بالعجلة خير كان الحل جاهز عندي وهو ((الطلاق)) بس قلت لا تستعجل يا ولد خلينا ندرس سبب المشكلة ، وبعد يومين توصلت لنتائج وقلت لازم أخليه يطلع عليها وبطرح عليه بعض الأسئلة يمكن العيب فيه ؟؟ تعرفون الدنيا تبي والآخرة تبي ، سألته هل أنت مقتنع أن ما معهم حق وهذه التصرفات اللي يسونها عيب ولا غير مقتنع ؟؟؟؟؟ قال : أنا مقتنع 100% أن تصرفاتهم خطأ قلت له : طيب ليه صابر عليهم ؟؟؟؟ إما انك ضعيف الشخصية وإلا البنت زينه( يعني جميلة وصح بكل شيء) و ما راح تلقى مثلها ولا تدور الأجر وهذا بعيد كل البعد فالأجر بصلاة الفجر وأنت ما تصلي الفجر ألا مع الظهر (اعرفه وسبق سكنا مع بعض وسافرنا مع بعض ما أحب افضح بالرجال ) وأمك لها سنه تصيح عليك ضاع لها أكثر من موعد بمستشفيات الرياض وأنت تقول ما افرغ (( اللي يسمعه يقول الراجحي)) قال : بصراحة البنت حلوة وتعبت لين حصلت المواصفات اللي أبيها قالت : إيش المواصفات اللي متعبتك لين حصلتها قال : وجه طفولي مع غمازات بالخدود وإني ما حصلت ألا بنتين وحدة رفضوني عشان أبوي سبق تطالب مع أبوها بالمحاكم عشان قطعت ارض ويوم شاف أبوي وعرفه طردنا وقال : لو أنا داري أن أبوك هذا ما دخلتكم البيت يالحرامية ، وزوجتي قالوا: تصبر سنتين عشان عمرها 14سنة وصبرت لين تزوجتها (( طايح بالدبس اللعين )) سألته عن علاقته بالعدلاء ( أزواج خوات زوجته) قال : بعضهم ما يطلع معنا إلا أذا صار ما فيه قطيه وبعضهم يمدح عائلته وتواصلهم ورحنا ورحنا وهو ما كد طلع ألا عام 1403 هـ يوم يحج بزوجته والثالث نفسية ينام ثلاثة أيام متواصلة والرابع يتعلث بالمسجد لا عزمته قال : عندي مسجد وأخاف أصيف على الجماعة والخامس لا صار الطلعة فيها حريم جاء يحب المناظر والموايق و لا صارت طلعت أرجال ما شفناه قلت : ايش نظرتهم لك ؟؟؟ قال : يقولون أن زوجتك لاعبة عليك وشلون تشتري ارض وتكتبها بسمها ؟؟ (هم صادقين ... ابعذره وجه طفولي وغمازات وين ذا فيه) سألته وين أنت ساكن ؟؟؟ قال استأجرت دور جنب بيت اهل زوجتي عشان ما اضرب مشاوير قلت : ليه تستاجر بيت أمك فاضي وهي عجوز كبيرة تحتاجلك ؟؟؟ قال : شارطين على بيت ( ابعذره وجه طفولي وغما زات ) قلت له : أنت إنسان طيب وحبيب بس أهل زوجتك ما عرفوا قدرك وشبيت عليه لين كرهته بهم وقلت شف اخوي (( ادحيم )) ما يشوف انسباه إلا يوم عيد الفطر لا وبعد عيد وراء عيد ولا يدخل بالنسباء والعدلاء ويهابونه ويحترمونه هو صحيح طلق بس إلى الحين لاشفوه يدعون له يقولون ما شفناه الله يوسعله ، والحل لازم تدور عائلة جديدة تفرض أسلوبك عليهم من البداية وتستفيد من أخطائك السابقة والمؤمن لايلدغ من الجحر مرتين قال : بس أنا عندي من زوجتي بنت أخاف تضيع قالت : شف نفسك أبوك مطلق أمك وصرت أحسن الناس ما ضرك قال : صدقت واقتنع الرجال وطلق زوجته وطاح عنه إيجار البيت وسكن مع أمه الحبيبة ( الأم مدرسة ) لا وزيدكم من الشعر بيت حليت مشكلة زوجته أرسلت لهم ولد عمتي يدور زوجة ويوم قلت له: فيه وحدة وجه طفولي وغمازات لا وبعد لها قطعة أرض بالشمال انجن وقال الفزعة ولك السعي قلت : ما أبغى السعي ابغا الدعاء بس خطبها الرجال وتزوجها بس اشرطوا عليه أن بنتها تكون معها وما كان راضي بس لازم يوافق (وجه طفولي وغمازات وأرض ) وقلت : لا تخاف البنت نحصل لها تصريفة بس لا كبرت وتعلمت تسوق السيكل تروح تستأجر بيت على شارع الثلاثين تقاطع شارع الستين عشان نشتري للبنت سيكل ونخليها تلعب بالتقاطع (الدنيا تبي والآخرة تبي )

[سليق المشرح]

ههههههههههههههههه صراحة موضوع تحففففة خخخخخخخ بس يبييله تكبييييير خط

اقول لك يا حج مشكوور على الموضوع شكلي انا بعرس على على بنت وجه طفولي وغمازات ومامعه بنت

بس عسى الله يفكنا من هالعزوبية صدز انه قشراااااااااااااااااءءما ترحم احد

[نجديه..$]

هي فبركة والا تعاليل ومزوووح

والا حكي من زود علم وبصيرة

.

إبداع وأسلوب أدبي جميل..

لاتعليق..

لاعمرك تنصح احد ..اما القصة فيها بهارات عالية الجودة

[الورود الناعمة]

والله شكلك مخرب بيوت عاد للطلاق مرة وحدة علمه كيف يضع حدود في التعامل ما تعطيه حل أبغض الحلال إلى الله هذا أنتم بعض الرجال يخربوا ويحسبون أنفسهم سلطان زمانهم

[أبو رزان]

ياناس لأحد يلومه بعذره لو صار دلخ ,, بلاهـ وجه طفولي وغمازات

[السامي البريداوي]

موضوعك يبدو أنه رائع لكن الخط قريب وأنا بي نوم لي عودة بإذن الله أرجو أن تنتظرني .

[وردهـ2]

أعجبني ردك اختي الورده الناعمه... المفروض تنصحه بتغيير تعامله مع اهل زوجته

هو مسؤل عن زوجته فقط...وحرام عليك أشرت عليه بالطلاق أعوذ بالله أنتم ماتسمعون برامج ولاتقرون كتب !!!

هذي بالله نصيحه له بالطلاق وجاي هنا تتضيحك ... العيب من الرجل لانه ضعيف الشخصيه مو من البنت....
والسالفه هذي راح تتكرر معه اذا ماغير شخصيته مع الزوجه الثانيه

مسكينه بنتهم ...الله يحفظ بيوت المسلمين بس

[هايين]

الله يصلحك فكيت واحد من اصدقاك بهالناس ورطت الثاني
بس مهوب حرام تذبحون البنت
ولا حادث ؟!


الانسان يجب ان يحسب لكل شئ حساب ولا يكون دميه يلعبون بها
صار سواق وجايب شغاله وتبيهم يحترمونه


الوسط الوسط




شكرالك

..

[فؤادعنتر]

((الدنياء تبي ولآخرة تبي ))


والرجال مجتهد

وصاحب خبره

ردود رائعه ................................ والقادم اروع

[المكتب العقاري]

اما سالفة العديل اللي ما يطلع الا اذا ما فيه قطيييه فيا كثرها 00 صراحة ياخوي مادري ليه اضحك وانا اقرأ قصتك او نصيحتك او مشورتك 000 فيها مطبات كثيرة على قولة احدهم بهاراتها مرتفعة شوي لكن يازينها من بهارات 00 روعة 000
سأحاول ان لا اكون ان شاءالله تعالي احد هؤلاء العدلاء او الرموز التي تتحدث عنهم 0
فالاخرة تبي والدنيا تبي خاصة اذ كان فيه [ وجه طفولي وغمازات ]

[اميره الحب والعشق]

اوجعنن عيوني من الكتب ملزقه وجهي بالشاشه
احس ان الرجل ذا بزر كل الي قالهن وساوس يتوهم