[ورود المساء]

السلام عليكم
انا عندي مشكله تؤرقني مره مره ويجافيني النوم وابغى اشوف انا طبيعيه او لا...... أغلى ناسي(((أمي)))...فقدته قبل شهروعشرين يوم.....ومرارة الفقد ماعنه مسؤل....لكن الي مزعجني مره اني اذا طلعت من بيتي طريقنا من عند المقبره وبعدين اذا مرينا اتعب الى حد مااحد يتصوره لدرجة ان النفس يضعف من شد ماابكي لان يجين شعور اني مابيني اناوامي الاالشي البسيط ويطيري عقلي....لااحد يقول ماعندك عقل او ماعندك ايمان لا انالحمدلله عاقله وعارفه وماعندي اعتراض بس هذا يجين اذا مريت وكل هكى الليله انحاس.......وزجي الله يهديه من اركب وانااقوله تكفى غير الطريق احيانا يطيع بس يبدا بس يهوش علي مره مره ((يعني يخربه))...حدثوني بعقليتي (( امرأه ضعيفه وحساسه وحزينه ))..لاتتحدوا معي بعقولكم...ووش رايكم انا طبيعيه اولا اوفيه احد مثلي....

[على طريق الأمل]

غاليتي أعلم كم هي صعبه مرارة الفراق،،،
ولكن حاولي قدر المستطاع نسيان ماحدث

[بقايا ذكريات]

أطلبي من زوجك الوقوف أمام المقبرة وابكي طويلاً حتى يتنفس الحزن فيك , فالهروب ليس حلاً , بل المواجهة هي الحل !

غفر الله لوالدتك , ستفرح حقاً في قبرها حينما تسعدين بحياتك دون هموم .

[**((الحنونه))**]

حبيبتي امرك طبيعي جداً
كل إنسان يصاب بمصيبه لابد ان يجلس معه الألم والحزن فتره
والحمدلله سريع ماتنسين هذا الشيء لكن أكثري من الدعاء لها وقول الحمدلله على كل حال وهوني المصيبه على نفسك وتهون
والجزع وعدم الصبر يزيدك سوء وينتصر الشيطان عليك فحذريه

ياربي نزل على قلبها الصبر والسكينه والرضى وأجبرها في مصيبتها

ويكفيك فرحا كون الكل يعرفها بالمرأة الصالحه رحمها الله رحمة واسعه وأسكنه الفردوس الاعلى

[رحيل الفؤاد]

شيء طبيعي..

لكن يا أختي إذا زاحمتك العبرات فابكي حتى ترتاحي وادعي الله لها بالمغفرة..

وأنت لم يزل جرحك ليناً.. نازفاً..يحتاج منك وقتاً ليلتئم..

وهذه أمك لن تُلامي في مدى حزنك العميق بفقدها..

أعظم الله أجرك.. وجبر مصيبتك.. وأنار بصرك للحقِّ وبصيرتك..

ـــــــــــــــ

[بقايا فـــــرح ..]

ياقلبي والله عليك ..

يسعدك ربي ويجلي عنك المولى هذا الحزن وبإذن الله أنك لمأجوره ..

حاولي في زوجك قبل ماتطلعون من البيت مو بالدرب إنه مايمر من عند المقبره ..

وحاولي تفهمينه إنت بنفسك والله إن شاء الله إنه بيتصور معك وبيراعي شعورك ويتفهم الأمر ..

والله يرحم والدتك ويجعل الجنه مثواها ولا تنسي الصدقه لها والدعاء فهي خير ماتقدمينه لها ويسعدها فقط ذلك منك ..

أختك / ورد

[ورود المساء]

شاكره لكم المرور....اثابكم الله واحسن الله اليكم.....اناالحمدلله ماعندي اعتراض واحاول قد مااقدر اني اتصبر...لكن اذاركبت السياره يجين هالامر شي خيالي اذا مريت من عند المقبره عقلي يطير ولااقدر اسلم عليه مااقدر اذا تخيلت الموقف وانابالبيت اني مريت او ابمر اليوم او بكرا اقعد اصيح وتنحاس النفسيه...

[السمو الروحي]

اعانك الله انا ايضا هناك من توفي عام 2004 ولم يدفن هنا بل في الرياض ولم
استطع حتى هذه اللحظه نسيانه بل لا اعلم ماذا يصيبني ..

اعانك الله و برّد دمعتك ..

[خلفان]

أختي لا تنسي [ التمر ] فهو مفيد جدا للحزن ! بمعنى انه يذهب الحزن إذا اكلتيه بإذن الله

[الوساااام]

شعور طبيعي جداً ..
وجميع النساء مثل حالتك عند وفاة والديهم أو قريباً منهم يحصلهم مثل الشعور ..!

اللهم اغفر لوالدتك واسكنها فسيح جناته ..

كلها فتره وراح تنسي وتتذكري هذا البكاء ..!

واقترح عليك تغير البيت سنة أوسنتين وإن شاء الله راح ترجعي الى وضعك الطبيعي ..

وإذا كان البيت قريب للمقبره ومُلك .. أستأجري بمكان ثاني بعيد عن المقبرة ..

ولا تحزني يأختي .. فاوالدتك بحاجة للدعاء لا بحاجة للبكاء ..

نحنُ كارجال وقلوبنا قوية نشعر بالحزن والآلم لما نمر من عند
القبر ونتذكر قريباً لنا قد دفن وليس بيننا وبينه إلا خطوات ..!!

فكيف انتم يالنساء ..!

اللهم أرحم موتانا وموت جميع المسلمين ..

[الأمل بالله]

يا عمري انتي .... والله حاسة بشعورك ... الله يصبرك ويعينك ... ليتي عندك

حبيبتي هذا شعور طبيعي ... والله العظيم طبيعي ... مو حاله نفسية أبد
بالعكس اذا ما حسيتي بكذا ذاك الوقت تشكين بنفسك

الله يرحمها أمك .. ويسكنها فسيح جناته ... راحت للي أرحم منك ومنا سبحانه ...

حبيبتي ثقي ان أمك مرتاحة بقبرها بإذن المولى عز وجل فلا تضيقي عليها بكثرة البكاء ... سبحان الله ما أدري وين قريته وهل هو حديث عن النبي صلى الله عليه وسلم أو لا لكن المهم في الأمر ان الميت يبلغه حال أهله من بعده وانتي لا ترضين أن يبلغها بكاؤك وضيقتك..

اقتباس المشاركة الأساسية كتبها بقايا ذكريات أطلبي من زوجك الوقوف أمام المقبرة وابكي طويلاً حتى يتنفس الحزن فيك , فالهروب ليس حلاً , بل المواجهة هي الحل !

وأنا مع أخي بقايا ذكريات توقفي في السيارة أمام المقبرة وانظري للقبر وابكي واخرجي كل ما كبت في نفسك ... اكسري هذا الحاجز ... لا تتهربين لأنك ع كذا ما راح ترتاحين ... وبتبتلين تتخوفين وتشيلين الهم

بالاخير بغيت أقولك اكثري من الدعاء لها والتصدق عنها أو آداء العمرة أو الحج

هذا يبي يريح نفسك ولو شوي في إنك سويتي حاجة لها الله يرحمها

الله يبعد عنك ما أنت فيه ويسخر لك زوجك ويحنن قلبه عليك ويكون لك أم وأب وأخو وزوج صالح .. اللهم آمين

[ورود المساء]

جزاكم الله خير.....اخي الوسام انا اتمنى قوه اننا نغير البيت لكن زوجي مايبي....لان مكانه مسبب لي معانات مره وهو دائم يهوشن يزود علي الي فيني يقول انتي غير طبيعيه وانااحس اني طبيعيه واكبردليل ان الرسول حرم دخول النساء للمقابر....

[مدحت شوقي بريده]

ورود المساء ..


ابدا انتي طبيعية ومابك الا العافية ..

انتي فيك صيحة .. وشكله مابعد طلعت .. وهي طالعة طالعة ..
متى ماطلعت تبي ترتاحين كثير ..
واذا مريتي من عند المقبرة .. طلعي اللي بتسبدتس كله ..

هذي فترة وتبي تعدي .. وماسمي الانسان ( انسان ) الا لكثرة النسيان ..
والنسيان نعمة .. وشئتي او ابيتي يبي يجي يوم وتنسين وتسلين بدنياك ..


ابداً وضعك جداً طبيعي لأنسانه فقدت امــه ..



انا لو من زوجك .. كان كل مامريتوا من عند المقبرة التفت عليك وقال ..
صاحت صاحت صاحت ..
عااااد الحريم مايبيلهن شي .. على طول تجيب اللي عنده ..
<<((== الله لايسلطك يامدحت .. راضعن من قريح والا ابازنه ..




سي يو ..

[ajmn]

أختي الكريمة . .

أنت فتاة . .

ولا أستغرب من أن يحدث هذا الشيء . .

فالفتاة مشاعرها لا تقارن بمشاعر الرجل . .

فما بالك بي . .

و والدتي دفنت في هذه المقبرة منذ الأزل . .

و يعتريني ما يعتريك . .

لكنه بشكل أقل . .

لذا يا أخيه . . كل ما عليك . .

أن تحولي هذه المشاعر . .

إلى دعوات . . صادقة . .

تنفع روح أمك . .

و ترفع من مكانتها عند ربها . .

لا تمنعي دموعا . . تذرفها عيناك . .

لروح والدتك . . ولكن . .

لا تحرميها أيضا من صادق دعواتك . .

رحم الله والدتي . . و والدتك . .

و أسكنهما فسيح الجنان . .