[أبو رُبـــــى]

وسرق الكراث ..

هذه العبارة ترددت على لساني منذ البارحة الساعة العاشرة والنصف ليلاً ..

اتصل علي جاري الله يجزاوه خير وقال السلام عليكم يابو ربى ..
أنا .. وعليكم السلام هلا والله أبو تركي ..
قال .. أنت بالبيت ..؟
قلت وش بغيت بس شوي واصير بالبيت .. ؟؟
قال .. معي كراث جايبه من المزرعة وابيك تذوقه وتذوق الجيران
وتوزع على أهلك ..
قلت له .. ماله داعي الكلافه يابو تركي ..
قال لا والله ما هنا كلافة بس ودي تذوقون حق المزرعة ..
قلت سم ابشر يابو تركي خلاص أنت حطه عند الباب وادق على عيالي
يفتحون الباب ويأخذونه ..
قال بس انتبه لا تخليه بالكيس على طول حطه بكرتون وإلا بخيشة وبالثلاجة
على طوووول ..
قلت سم ..
طوط طوط ... << سكر السماعة ..
اتصلت على عيالي بالجوال .. رن رن رن طننط طننط << انقطع الخط .. << هاه غريبة .. !
اتصلت على الثابت .. ترن ترن ترن << طوط طوط << انقطع الخط ..
غريبة مهب عاده الجوال يمكن بس الثابت ما توقع ربى وإلا خواته يبي يسمعن التلفون يرن
ولا يشلنه .. << قولوا الله يحفظهن .

اتصل أبو تركي ألو ..
هلا ابو تركي .. معليش ابو تركي دقيت على عيالي مايردون ..
قال طيب تراي حطيته عند الباب بسرعة لا تخليه بالكيس ..
قلت سم سم ابشر .. الله يجزاك خير أشغلناك ..
قال لا لا ما اشغلتنا ولا شي .. يالله مع السلامة ..مع السلامة ..

رحت للبيت وكانت المدة خلال خمس أو عشر دقائق فقط .. !!
وصلت البيت أناظر الباب مافيه شي .. هاه ..
إيييه يمكن عند الباب الثاني .. وأشوف هاه
مابه شي .. !!
إيه اكيد ابو تركي رن الجرس وفتحوا عيالي واخذوه ..

طيب ...

فتحت باب الكهرب .. دخلت .. فتحت باب البيت هاه غريبة ما قفلوه .. ؟؟
شانت النفس أبهوش عليهم وراهم ما قفلوا الباب وهم يبي ينامون ..

يا ولد يا بنت يا ............. هاه

دخلن الماء ..
قلت الله يستر .. لا كراث ولا عيالي .. !!
رحت لم امي .. يا ولد يا ولد .. << ادخل ياوليدي ..
فتحت الباب .. واسمع صوت عيالي .. وتنهج الخشة
السلام عليكم ..
عليكم السلام ..
وراكم ما تردون على الجوال ولا على الثابت .. ؟
إيه مخلينه بالبيت وجينا لم أمك نتونس معه ..
اهاااا .. طيب أخذتوا الكراث ..؟
وش كراثه ..؟
هاه .. الكراث اللي جابوه ابو تركي ... !!
ماشفنا شي .. !
هاه ... طيب اسألوا الشغالة يمكنه فتحت الباب واخذته يوم يرن الجرس أبو تركي .. !
( طبعاً الشغالة آجار ) وقلت يمكن ماتدري إنه ماعندنا شغالات يفتحن الباب .. بس قلت يمكن هذي ما علموه عيالي ..

سألنا الشغالة ..
هيني .. أنتِ فيه شيل كراث من باب برا ..؟
لا لا ماما أنا مافيه افتح باب .. !
هاه .. بسم الله وين راح الكراث .. ؟
طلعت اشوف وادور يمكن غلطان بالباب وحاطه عند باب أمي .. هاه مافيه شي .. !! غريبة ..
واناظر وإلا فيه رمل عند بابنا وإلا فيه سكة سيارة صغيرة ضافن الكراث ..


فقلت سرقة الكراث ولا سرقة عيالي ..


نراكم على خير حبايبي ..